Gedink niks sport die week nie?

Gedink daar is 'n kans dat ons die week sal deurgaan sonder sport? Nie maklik nie, want al die toernooie is om die draai en die spanne moet soveel wedstryde moontlik speel om gereed te wees. Gister het Nelmari se JV (Junior Varsity) span teen ACS gespeel. Alhoewel hulle verloor het, was dit 'n baie goeie wedstryd. Die eindtelling was 33 - 40 in ACS se guns. (Hierdie twee spanne speel altyd 'n dodelike wedstryd teen mekaar - iets soos die ou Blou Bulle en Province rugby wedstryde). Hier is 'n paar foto'tjies.

Die "bench" moedig die span aan. Nelmari reg op die linkerkant se punt.

Die afrigter maak gereed om 'n speler (nr. 25 Nelmari) op te stuur. Die van julle wat nie die spel so goed ken nie, die speler moet langs die tellinghouer wag totdat hulle kan opgaan.

Moenie kommer nie Lions, Nelmari is nou daar om te help verdedig.

Maak gereed om "Go Lions" te skree. Die span lyk nie erg gestres met die wedstryd nie. Nelmari regs van die juffrou.

Spanpraatjie na die wedstryd en Nelmari dink dis snaaks. Of miskien is dit vir die fotograaf wat sy lag .... Nee, hulle het hul briewe vir die Egipte toer gekry en dis pure opgewondenheid.

Die Varsity span van William hulle het Dubai toe gereis vir 'n wedstryd daar. Ongelukkig kon ons geen amptelike fotograaf saamstuur nie. Hulle het teen DAA gespeel die wedstryd verloor met 12 punte, nl 25 - 37. Dis nie te sleg nie, want weereens vir die wat nie die spel ken nie, 'n doel tel meestal 2 punte, met sommiges wat 3 tel so die oorwinning was nie te groot nie. (Ek hoop my feite is korrek anders het ek die kinders op my nek)