Henne(a) partytjie

Soos altyd wil die meisies hulle hande gehenna he as daar gekuier word en ek het ook nou al vrede gemaak dat Nelmari dit doen, want dit hou net 2/3 weke en dan is dit weer 'n jaar tot die volgende keer. Ons gaan gewoonlik na 'n tradisionele "salon" toe waar daar nie foto's geneem kan word nie.Ek kon hulle darem afneem voor die "salon" met sy groot plastiekblomme, na die tyd. Ek wens so ek kon julle 'n kykie gee van wat binne aangaan. Die vertrek is 'n sit/eetkamer grootte met klomp sit/le stoele. Op elkeen 'n vrou met haar hande in die lig en voete teen 'n waaier om die henna droog te kry. O ja en ek moenie vergeet om te se die mure is 'n helder oranje en geel geverf!! By party sit daar een vrou by elke hand en verf. Die voetsole word so "geplaster" met die henna ... en ons bespiegel waarom. Ook die naels en vingerpunte. Gelukkig is die kinders nog nie daar nie! Dan het meeste van hulle nog selfone waarop daar gekekkel word en deel hulle die gesprek met die vrou aan die verste kant van die kamer en alles in Arabies. Mens kan eintlik hoor hulle praat van jou as almal so kyk na die mense met hul gewone klere en witgesigte. Ons hoor hoe hulle die lande raai waarvandaan ons moontlik kan kom want hulle ken nie die taal wat ons praat nie. Gelukkig is Nelmari by en sy moet luister en vertel wat hulle se dat ons darem kan antwoord. Wanneer mens eers daai kontak gemaak het, begin hulle uitvra en vertel dat hulle besig is om voor te berei vir 'n troue. Die familie kom so bymekaar en almal laat doen hulle hande en voete en bly en kuier sommer heeldag tot almal sin droog is. Ons besluit toe sommer dis waar 'n henne-partytjie vandaan kom!