Vakansie "Special"

As mens so deur die blogs lees, dan gaan dit maar rof orals. So 'n einde van die jaar fisiese en emosionele moegheid wat in Julie kop uitsteek.

Dit gaan maar woes want vanoggend werk niks in my huis nie en my motor wat ek ingeneem het vir 'n probleem is ook "weg". Nie in die stelsels nie vertel hulle my in 'n onverstaanbare engels. Dan praat ek nie eers van die voordeur wat nie wil oopsluit nie --- ek en Nelmari is omtrent gehok. Oppad om te gaan hulp soek, hoor ek oor die radio van 'n lekker vakansie special.

Die Emirates Palace waarvan ek so 'n dag of twee terug vertel het adverteer wat hulle se is die "ultimate holiday!" 'n Sewe aand bly in die hotel vir $1000000 !! En dan moet julle weet koop julle nie die hotel nie, jy bly in 'n 680 vkm 3 slaapkamer suite vir 7 aande. As julle nog nie oortuig is dat dit 'n winskopie is nie, neem kennis dat die suite afgerond is met goud en marbel met kristal kandeliere, 'n sitkamer met 'n 61 plasma tv, skootrekenaars en 'n lyfbediende 24 uur per dag ...

Nog nie oortuig nie? Dit sluit ook alle etes en drinkgoed in enige van die 13 restaurante in.

EN vir julle wat voel mens moet darem 'n bietjie ekstra ook vir die prys kry sluit dit die volgende daguitstappies in:


Vlieg met 'n private vliegtuig na Bahrain waar jy kan gaan duik vir jou eie perel wat daar in 'n handgemaakte pereljuweliersware omskep word. Ek neem aan as jy meer geld as duikvernuf het, kan jy seker iemand betaal om vir jou te duik.
Dan word jy ook Jordanie toe gevlieg vir 'n modderspa behandeling by die Dooie See en


jy gaan maak 'n vinnige draai in Iran waar jy jou eie Persiese tapyt kan laat maak.


Die dae wat jy dan nou nie so rondrits nie, sal enige van die klompe chaffeur bestuurder hotelvoertuie vir jou beskikbaar wees (Rolls Royce). Dan kan die manne gaan golf speel en die vroue hulle eie parfuum gaan laat maak. 'n Toer na 'n woestyneiland en diepsee visvang is ook ingesluit met daaglikse spa behandelings by die hotel.



Geinteresseerd?!? As totsiens kry jy handgemaakte wapens van 'n baie bekende maatskappy wat ook die "customs" by die lughawe sal uitsorteer. Laat weet as ek vir julle kan plek bespreek.