Ons toer nog

Hennik se "toer" vat ons ook deur Franschoek, seker een van die mooiste dorpies in die Kaap. Daar is net 'n ander tipe atmosfeer in die strate met al sy klein straatkafeetjies en goetertjies. Lekker restaurante en winkeltjies en hier moet ons eers gou die Jasmyn ruik. Die pragtige ou kerk met die blou berge op die agtergrond. Annie onthou jy hoe Charmaine vir ons gesing het op daai toer van die Kaap na Pretoria en onthou jy wat sy gesing het? Daar is ook heelwat kunswinkeltjies vir snuffel. Heelwat van die ou huise is so mooi reggemaak en mens gaan ver soek vir moderne geboue. Dit dra verseker tot die atmosfeer van die dorpie by. Maar alles is nie net oud nie. Ons besoek ook die Graham Beck wynkelders. Ronelle ek het nie kon oplees oor die jagluiperds nie, maar ek sal nog. Dit is 'n baie moderne wynkelder met heel beeldhouwerke orals in die tuine en een van die Du Toits se gunsteling kuierplekke. Die laaste stoppie van die dag is by Fairview landgoed waar hulle 'n baie gewilde restaurant The Goatshed het. Weet nie of julle die foto kan vergroot nie, maar die badkamers se name is "Billy Goat" en "Nanny Goats". Hennik koop een van hulle vars brode. Ek is seker dis waar die restaurant se naam vandaan kom en die drie bokke het mooi saamgewerk vir 'n foto. Dan moet ons natuurlik by die plaat kosmosse gaan staan en hier na al die kaas en wyn, moet ek Ronelle so bietjie help :-). Hennik besluit op 'n kalenderfoto met 'n kosmos in die mond. En sommer net omdat ons in elk geval die heeltyd eet, nagereg in die motor, Fudge van Bokmelk. (Die foto vir jou maat dat jy kan sien). Dankie vir 'n wonderlike dag julle twee, ek het so lekker "getoer".