Battle of the shoppers - in 'n nuwe ou mall

Ek weet nie hoe oud is die bekende mall nie, maar ek weet dat dit reeds hier was toe ons baie jare terug UAE toe gekom het. Met die tyd is daar aangebou en groter gemaak.Die laaste klompie jare het ons glad nie die mall besoek nie, maar hierdie week was weer tyd en aan Nelmari se reaksie gesien, is die kinders nou groot ... want waar die winkels hulle vroeer nie aangestaan het nie, is/was dit nou so reg in haar kraal en baie cool. Die mall se boustyl is Egipties en dit lyk werklik indrukwekkend van die buitekant. Hierdie foto het ek sommer in die ry geneem van die mure na die parkeerarea. Aan die binnekant is die drie lig-piramides waar lig natuurlik inskyn, die hoof features en dis werklik pragtig. Twee van hulle is versier met pragtige glaswerke wat verskillende temas wys. Hierdie een is weer 'n glas "toring" waar die lig op skyn. Die mall is groot met 350 winkels en dit skep 'n ruim rustige atmosfeer waar mens lekker kan drentel. Wafi het deur die jare heelwat pryse gewen vir oa "die beste shopping-mall", beste restaurant, beste nuwe hotel, beste spa en beste boutiek. Volgens hulle is die beste winkel enige plek ter wereld, Memoires wat glad nie soos 'n winkel is nie.

DIt is 'n teater, museum, kunsgallery, alice in wonderland dreamworld en disney fairytales en nog baie meer alles in een. Hulle verkoop meubels en ornamente, juweliersware, glaswerk en klomp ander goed. Blykbaar lyk dit meer na een groot uitstalling as iets wat mens kan koop. Ons het dit nogal nie besoek nie .... Hulle se ook, die verkoopsmense lyk asof hulle op uitstalling is. Die mans dra hoe kraag, enkellengte baadjies wat lyk asof hulle direk van Phantom of the Opera kom en die dames is net so opgedress. Volgende keer is dit beslis op die lysie. MAAR die rede was ook om te sien wie van die selfaangestelde "shoppers-queen" Nelmari of vorige titelhouer Charmaine nou eintlik die grootste shoppers is. Aan die einde van die dag is daar 'n besliste wenner, maar julle sal more moet kom kyk wie.