Help 'n bietjie

Verlede jaar in Oktober rond het ek hier vertel van een van die straatkatte wat kleintjies in ons elektriese boks gehad het. Straatkatte kry baie swaar in hierdie dorp en daarvan het ek ook vertel. Meeste van die plaaslike inwoners weet nie hoe om met diere te werk nie en voels, honde en katte word mishandel en sleg behandel. In die begin was dit vir my vreeslik om 'n klein baba katjie dood langs die straat te sien. In Muriel se blog hier vertel sy van hoe wreed mense met honde was, en dit het net weer gewys dat jy orals mense sal kry wat nie weet hoe om diere te behandel nie. Hierdie was die eerste keer dat ons vir Pixie gesien het, voordat sy baie wild haar intrek in die huis gemaak het. (Julle sal in regter kantlyn kan sien, sy's erg deel van die huis) Maar dis nie die storie nie want die ma kat het weer kleintjies en terwyl ek op vakansie was, is daar besluit dat een van die drie baba's aangeneem gaan word deur ons. Hier kan julle twee gesiggies tussen die bourommel sien. Vas van plan om vir hulle goeie huise te kry, stel ek voor dat ons die kleintjies hierdie keer mak en gewoond aan mense maak sodat voornemende "ouers" se harte sommer sal vermuwwe en dadelik een wil he. So kry ons eers nr. 1 gevang en binne 'n paar minute van blootstelling aan 'n huis met mense is ons vermuwwe. Sy prrrr en wil net in mens se nek kruip en geniet die aandag en huis baie. Nelmari wou oorspronklik die donker enetjie, nr. 2 he. Is sy nie te lelik vir woorde nie? Sy is nog nie opgetel nie, maar hopelik die week. En vandag kon ons eintlik nr 3 ook aan die huis en mense voorstel en sy het net so maklik daaraan gevat. Nelmari begin nou twyfel watter een want hulle is al drie verskriklik oulik en sy gaan beslis nie al drie kan hou nie. Sy wil nou weet watter een kies julle en wat kan sy hulle noem. Blykbaar het Sleeping Beauty drie feetjies gehad en is die name as 'n moontlikheid genoem. Help 'n bietjie asseblief?!