Ons kuier lekker

'n Lekker bonus gedurende die vakansie was 'n kort besoekie van tannie Bes, Charmaine en Elriza by ons. Dit het beteken ek het net 3 daggies om die "Kaap" aan hulle te probeer verkoop en eintlik is sy net hier op te "shop" en hierdie keer vir 'n ou eiendomtjie in een van die rustige dorpies. Ons het egter soveel moontlik probeer inkry en die eerste "afshow" van die Kaap was die kusroete (berg om) vanaf Gordonsbaai na Onrus. Ons eerste stop ... natuurlik is om te eet .... en omdat ons nog self nog nie daar was nie, is Sea World in Hermanus 'n goeie keuse. William vertel dat ons "ouer" mense nie die trappies op en af gaan maak nie, en ek moet erken dat mens nie teveel na die uitsig kyk terwyl jy die trappe aflklim nie. Jy konsentreer en maak berekeninge hoe jy na ete weer hier gaan op. Die jongmense het egter nog tyd om te glimlag terwyl hulle afkom. Die restaurant sit so onder die rotse met die see reg langs jou. Tannie Bessie loer vir die foto. James vat sy telefoon vir 'n "walkie". Ek vermoed Leane word ingelig oor waar ons is en wat ons doen. Elriza gaan ook nader om te kyk of sy nie walvisse kan sien nie ... en ek's bly ons kon hulle darem so twee wys wat in die baai gekuier het. Die kinders besig om kamstig vir my te "pose". En dan kom die kos en almal verkeer vreetsaam met die snoek, geelstert, viskerrie en calamari. Nelmari wen hierdie keer die prys vir die grootste bord --- met ietsie van alles in. (Gelukkig het sy en William darem gedeel). Hulle is moeg van die vroee vlug en lang rit maar ek dink op hierdie stadium is dit Kaap 1 - Ander 0. Gelukkig ontdek ons 'n makliker terugpad met minder moeilike trappies en sien dis eintlik die amptelike ingang. Wat sal 'n mall sonder Charmaine wees en in 'n shopping blitz verdwyn die moegheid en kan ons vinnig 'n paar pakkies bymekaar maak. Vicky hier's oulike klere vir die kinders ;-). Die kersie op die koek is 'n feetjie winkel !!! Nelmari en Charmaine bestudeer van die feetjies. En wat se hierdie gesig dink julle? Die klomp is moeg rondgeloop en wag vir die "ouer" tannies wat nog nie einde het nie. Nou moet daar nog voete in die water gesit word .... maar daarvan vertel ek volgende keer.