Die Hammans kom kuier by Onrus

Dit was nou lekker om so saam met my sus Marie en haar familie by Onrus op te daag. Daar is gekuier en gesels en gelag asof ons mekaar die anderdag gesien het. Met 'n tipiese Kaapse dag wou die kinders nie swem nie, en het maar op die dek gekuier en pyltjies gestuur. William het 'n baie rustige houding en probeer allerhande toertjies uitvoer. "Klein" Jaco is so naby aan die bord, hy kan maklik bulls gooi. James lyk maar moedeloos met die klomp of is dit omdat hy die son uit ouma se oe moet hou? Nelmari het self 'n aksie vir haarself en die vrouespan (Marie en Nelmari) in hulle woorde ... skop gat :-). Nou vir Marie ken julle na haar "Noot-vir-noot" vertonings in September en weer stel sy nie teleur nie. (Sy blyk baie lief vir die kamera en "perform" te wees).

Maar vir haar is dit nie eers speel nie .... daar word eers opgewarm....

En dan word daar gegooi met die nodige ondersteuning en performance. Die seuns kan maar net staan en lag. Sy raak darem moeg ook en besluit om telling te hou en die spanne aan te moedig.Middagete is regte vis en chips vars van Onrus se viswinkel, en almal kuier lekker. Einde van die dag en ek probeer die nefies en niggie afneem, maar daar word so gekgeskeer dat ek dit nie regtig regkry nie ... ek het maar net gedreig... die troue kom en ek en my kamera gaan daar wees!