Versoekings

Partykeer, net partykeer is 'n roomysplek 'n groot versoeking. Dis nie iets wat ons elke dag of maand doen nie, maar by een van ons malls het daar 'n nuwe roomys plek oopgemaak. Ons het in die verbygaan net so daarna geloer, die plek is heel onbeskof reg in die middel van die mall en in die oopte. Met roomysgeure soos, piesang, mocha sjokolade, wit sjokolade, gewonde sjokolade, mango, gemengde vrugte, groentee, vaniella, strawberry, caramel hoef ek meer te se?

Ons lyk heel skuldig en ek weet nie waarom nie, ons doen dit mos nie elke dag nie? Maar jinne dis 'n klomp roomys!
Net om te wys dit was nie net 'n "oumensgier" nie, Nelmari was heeltemal game .... miskien het sy ons in die versoeking gelei.
Hier is ons geure en kleure roomys. Nelmari het 'n skeppie gemengde vrugte, suurlemoen en strawberry gehad, myne was vaniella, sjokolade en piesang en Charmaine het mango, groentee en gemengde vrugte gehad. Dit was lekkeeerrrrr ouens. Maar so iets doen weer in 2011 of iets ?!

Olke bolke ....

Die vrouens wil bietjie handwerk en Elise bied aan om vir ons te leer. Sy noem allerhande opsies en ek bly maar stil, laat die jonger mense besluit wat en hoe .... Eintlik besluit hulle op sakke vir die groep waarop ons servette gaan stryk. Ok nou onmiddelik het ek 'n prentjie in my kop en vir geen oomblik kan ek dink dat dit "kuns" en "handwerk" is om 'n servet op 'n sak te stryk nie. Gisteraand daag ons toe by haar op vir die "klas", ek met 'n groot vraagteken in my kop.

Elise het alles mooi uitgepak en sy verduidelik wat elke ding is en wat ons daarmee gaan maak.

Ons moet vir ons 'n servet uitsoek om op die sak te sit. Jinne en het sy 'n verskeidenheid. Amelia en Charmaine het vreeslik gewonder watter een om te kies.

Nelmari en Corinna redelik seker wat hulle wil doen al het Corinna ons "getreat" met 'n sangnommertjie

Die prentjie moet aan die gom vasgestryk word en Elise verduidelik vir Amelia
Iets wat ek nie elke dag sien nie, Nelmarie met 'n yster (ons het 'n strykman wat ons klere stryk). Hier stryk sy haar prentjie vas.

Sy werk aan haar prentjie se raam.

Orals ewe ver van mekaar af verf Amelia haar raampies en sy is doodstil.
Corinna ook hardbesig met haar raam.
Ek werk darem tussen-in aan my prentjie ook terwyl ek foto's neem
Charmaine konsentreer hard met die ligblou verf
Hier is haar eindproduk, muise om die teetafel
Myne kom ook klaar....bont koeie

Corinna se rustige klassieke werk
Nelmari se vrolike feetjies
Amelia se kleurvolle blom
Met ons sakke reg vir shopping .... of is dit rugby wat nou-nou begin?

Dankie Elise ons het dit almal verskriklik baie geniet. Ek dink elkeen se sak vertel sy eie storie en ons wag om volgende Sondag jou beertjiesak te sien! Die vrouens wat vanaand nie kon kom nie, julle het ernstig uitgemis.

Trippie na Fuijerah 3 - Oud, ouer en stok oud

Ek het uitgesien daarna om die ou Fujairah fort weer te sien. Die vorige keer toe ek daar was, het hulle nog ernstig aan die plek gerestoreer. Dit op sigself is 'n wonderwerk, want omdat die land nog so jonk is, restoreer hulle nie sommer plekke nie. Dit word oud en dan vervang hulle dit.

Die ou fort staan so 2km van die middedorp op 'n klipperige koppie met die Hajar Berge op die agtergrond. Vroeer jare was die fort die huis van die Fujairah heerser en sy familie.

Dis 'n groot kasteel wat in 1670 AD gebou is en bestaan uit 3 "toring" dele verbind met gange en sale wat omring is deur die fort gedeelte. Baie van die moddersteen huisies wat die fort omring het, is nog steeds daar maar slegs muurhoogte. Voor kan julle 'n ou verbrokkelde huisie sien.

Daar is 'n paar nuwes gebou, seker om te wys hoe dit regtig gelyk het. Mens kan nogal die geskiedenis van die plek self skryf as jy so daarna staan en kyk. Ek self het nie uitgeklim om foto's hier te neem nie, maar hier kan jy sien dat Charmaine vinnig terughardloop motor toe. Ja .... hier probeer mens vir die hitte weghardloop, maar dit gaan orals saam met jou.
Ons volgende geskiedkundige stop is die Al Bidya moskee. Hierdie moskee sit so teen die berg en is na beraming omtrent 400 jaar oud.

Die moskee het vier koepels wat met slegs een pillaar in stand gehou word en word as taamlik uniek vir daardie tydperk beskou. Dit het ook geen "minaret" nie en is die oudste "werkende" moskee in die UAE.Daar is 'n pad wat agterop loop na die "watchtowers". Ek's nie seker wat hulle "gewatch" het nie, maar die uitsig van daar oor die berge en see moet pragtig wees om te sien. Ons het vanwee die ouderdom, hitte en kniee nie die toggie aangedurf nie.
Die foto'tjie is binne die moskee geneem, maar omdat dit half skelm gemik was (daar was moslems in en jy mag hulle nie afneem nie), is dit 'n goeie verskoning vir die uit fokus wees. Maar net sodat julle 'n idee kan kry van al die matte aan die binnekant.

Nie 'n baie duidelike foto nie, maar daar is ook "rakke" ingebou waar die Quran spesiaal gehou is.
Ons het die geleentheid gekry om binne te gaan as ons die swart rokkie aantrek en ons skoene buite los.
Neem vinnig die foto dis warm, die grond brand en die swart trek die son nog meer aan ...