Wie is skelm ???

Saterdae is gewoonlik ons fliekdae, as daar natuurlik 'n goeie fliek speel en hierdie week was geen uitsondering nie. Vroeg oggend fliek is eintlik lekker gedurende Ramadan want dan slaap almal wat vas nog na die vorige aand se deurnag eet, maar die verversings is 'n probleem. Die restaurante en selfs die fliek se winkeltjie is toe en hoe gaan mens nou fliek kyk sonder nachos, kaas en ietsie om te drink?!?! Met die jare het ons daai probleem half oorkom, deur vroegtydig die nachos ens. te koop en dit dan saam te vat en dan moet mens dit selfs voor die tyd uit die sakkies haal om te keer dat almal weet jy eet as die sakkie so raas. Skelm ek se jou, dis wat mens leer.

Hierdie week het ons die nachos en kaassous klaargemaak gekoop en omdat sakkies ook nie toegelaat word nie, moes elkeen dit in haar eie handsak dra saam met die bottel water. Hier help Nelmari vir Charmaine haar eetgoed in haar handsak sit. Stem julle saam dat hulle sommer skuldig lyk.

Kyk net hoe lyk die handsakke wat ons stilletjies moes indra, oopmaak en uiteet .... trommeldik!! :-) Ons het My Sisters Keeper gaan kyk en dis hoogs aan te bevele, neem net baie tissues saam.

Mooi week vir julle!

Dis weer Ramadan

Dis alweer Ramadan in die land van die sand .. die heilige tyd van die jaar vir meeste van die UAE se inwoners .. met klomp voorskrifte vir ander wat nie dieselfde geloof het nie. Ek het nog elke jaar geblog oor die tydperk en hoe ons dit hier ervaar, so skuus as ek herhaal. Hierdie net in 'n neutedop.

Ramadan is hulle heilige maand en volgens hulle ook die tyd om meer van hulle heilige boek te leer om sodoende die boek se blessings te ontvang. (let wel “die boek” se blessing). Die maand word ook deur party die maand van die quran genoem. Deel van die groei proses is dan ook die vas om jou te reining van alles wat jy verkeerd gedoen het. As jy die maand streng by die vasreels hou, is al jou sondes ook vergewe. (dink net, 'jy moet ‘n jaar wag en hoeveel sondes doen ons in ‘n jaar?). Baie belangrik is dat gedurende hierdie maan jy jou humeur moet beheer, nie kwaad of sleg praat nie, vasbyt, versoekings weerstaan ens. en hulle moet vir die armes gee.

Hoe raak dit ons? Vanaf sonopkoms tot sonsondergang mag ‘n moslem wat vas, glad nie eet nie en dit beteken dat ons ook nie mag eet en drink in die publiek nie want hoe kan hulle “sterk” staan as hulle bv die water “ruik” wat ons drink? Dis nou nadat hulle lekker reuklose kos, donuts ens. gekoop het om vir hulle kinders te gee of gedurende die aand te eet. ‘n Goeie “ban” is die geen rook in enige publieke plek nie en jy mag ook nie lelik praat nie

.

Mens moet ook seker maak jy’s betaamlik aangetrek ingeval jy iemand in die versoeking lei en geen “display of affection among couples whether married or not in public areas” word toegelaat nie. Hier kan julle van die borde by die malls sien wat vertel jy moet reg aantrek.

Vir ons wat al lank hier is en sien hoe die “maand” deur baie net as verskonings gebruik word om op die pad te jaag asof die duiwel agter hulle is, hulle meer bakleierig en ongeduldig te maak kamstig vanwee te min slaap en kos, hulle meer gewig optel gedurende die vas maand van ooreet wanneer dit donker is, is die maand eintlik ‘n klug, maar ek kan nie veralgemeen nie, want daar is toegewydes wat alles doen wat vereis word en wonderlike mense is.

Dit laat my net weer besef hoe belangrik dit is om te doen wat mens se. Om vir almal te vertel jy’s ‘n Christen en dit nie wys in jou dade soos oa humeur, ongeduld en hoe jy leef nie, mag ander gelowe ook laat dink ons is ‘n klug …. Ons moet wys ons is anders in hoe ons optree en leef en maak ons foute soos ons almal doen, hoef ons gelukkig nie ‘n jaar te wag om vergewe te word nie.

Alles verander in dorp

By die huis is dit Lentedag, maar in hierdie dorp en land is dit vandag die begin van Ramadan. Vir julle wat nie weet nie, Ramadan is 'n godsdienstige tydperk vir die moslims wat elke jaar gedurende die 9de maand van hulle islamiese kalender gevier word (hulle maande skuif). Hulle glo dat dit die maand is waarin die koran "geopenbaar" is en vir hulle die mees geseende tyd van die jaar. Vir die moslems gaan die maand hoofsaaklik oor vas. Gedurende hierdie tydperk staan hulle voor sonsopkoms op om ontbyt te eet (suhoor wat die voor-son-opkoms-maaltyd is, nie Wimpy se Sunrise nie) en daarna moet hulle gaan bid. Hulle is veronderstel om die heeldag sonder kos te bly. Die vierde gebed van die dag is met sonsondergaan en dan word die vas vir die dag gebreek

Dis die tydperk wat hulle veronderstel is om meer effort in hulle studies van hulle geloof in te sit en nog 'n klomp ander moets en moenies. Dit alles sal hulle nader aan hulle allah bring en vrede gee. Maar dit mense is net hoe dit veronderstel is om te wees, en nie hoe ons dit hier ervaar nie. Ek sal julle my hele gevoel oor die maand spaar maar kyk bietjie hier vertel ek hoe ek voel oor Ramadan en oor Iftar en natuurlik watter invloed dit oa op ons gereelde fliektyd en wat gebeur aan die einde van Ramadan.


Ek gaan gelukkig 'n deelte van die crazy maand nie in die dorp wees nie, maar vir julle ander wat hier agterbly en STERKTE! Dis ook 'n tyd vir ons om nog nader aan ons Pa te kom sodat ons die geduld en krag kan he om alles in hierdie maand te hanteer sodat ander Hom in ons kan sien.

Einde van Ramadan met Eid

Uiteindelik die einde van Ramadan!!! Wat voel soos 'n ewigheid van alles wat toe is op ongelee tye, verkeer wat iets afgryslik is, diens by maatskappye wat nie-bestaande is en allerhande ander ongerieflike dinge, is die 30 dae van vas vir die mense in die land amptelik verby. Dit beteken 'n paar dae vakansie met die viering van Eid ul-Fitr of Id-Ul-Fitr عيد الفطر wat sommer kortliks Eid genoem genoem word. Dit is 'n Moslem vakansiedag wat die einde van Ramadan, die maand van vas aandui.

Alles hier gebeur met die "sighting" van die maand en hierdie foto wys hoe die maan lyk met begin van Ramadan en dan weer aan die einde. Orals is manne wat spesifiek die maan dophou, om aan te kan dui wanneer die maand van Ramadan begin en/of eindig. Nou Fitr beteken die breek van die vas. Die oggend van Eid in 'n tipiese muslim huishouding word almal vroeg wakker. Na die eerste bid van die dag, kan die familie dan 'n klein bietjie eet (weet nie of hulle weet van klein bietjie nie) om die einde van Ramadan te vier.

Hierdie is 'n kaart soos hulle opstel wanneer en waar die maan gesien word en hoe dit oorbeweeg na die verskillende lande. Bidtye is dus nie vir al die moslems oor die wêreld op dieselfde tyd nie. Selfs in Abu Dhabi is daar 'n vier minute verskil van Dubai s'n. Nou wanneer die ouens hulle eerste ontbyt gehad het, gaan hulle na spesiale "dienste" toe wat slegs in moskees gehou word op die dag. Hulle bid 'n baie kort gebed en luister dan na die khutba, (die preek). Daarna omhels hulle mekaar in die gees van vrede en liefde en begin die groter as groot eet kompetisie. Huise van familie en vriende word besoek om God te bedank vir al die seeninge. By elkeen van die huise eet hulle natuurlik.

Eid is 'n baie feestelike geleentheid en 'n dag van vergifnis, geestelike oorwinning (vir die wat regtig gevas het), vrede en eenheid. Hulle sê ook dankie vir God vir die krag en sterkte wat hulle glo hy hulle gegee het gedurende die maand en vir die hulp om deur die maand te kom. (Ek's bly ons kry elke dag krag en sterkte en nie net een maand per jaar nie). Dis ook 'n tyd van gee en deel en almal trek baie feestelik aan. Kinders kry nuwe klere en speelgoed. Familie en vriende gee vir die kinders geld. Op hierdie dag lui ons deurklokkie ook aanhoudend soos die kinders ons kom Eid Mubarak toewens en geld bedel in 'n land waar bedel verbied is!

Ek voel ook na feesvier want nou kan ons weer soos normale mense in die strate ry, winkels besoek, eet en koffie drink!

Fliek en Ramadan

Soos ek in 'n paar blogs alreeds vertel het, speel Ramadan 'n groot rol in wat op die oomblik hier in Abu Dhabi gebeur .... niks!!!! Ons meisies gaan woonlik op Saterdae fliek en die laaste paar twee weke is daar net mooi niks wat speel wat ons nie alreeds gesien het of beslis nie wil sien nie. Maar ons gaan ons nie laat onderkry nie, want ons vervang dit sommer met 'n DVD by Charmaine se huis. Hierdie week kyk ons na Miss. Potter

Weet nie wie van julle dit al gesien het nie, maar dis regtig 'n baie oulike storie. Iets waarvoor jy nie ongemaklik voel as jy jou dogter saam met jou by die fliek het nie.
Dis die lewensverhaal van Beatrix Potter wat al die Beatrix Potter (natuurlik) boeke geskryf het.

Hier is 'n prentjie wat sy geverf het toe sy slegs 8 jaar oud was. Weet nie hoeveel van julle al haar boekie gesien of gelees het nie, maar soos in die boeke is die natuurtonele in die fliek verskriklik mooi. Meeste mense ken Beatrix Potter net as 'n gewilde tema vir 'n babakamer, so gaan kyk gerus die fliek.

Die fliek self het niks met Ramadan te doen nie, maar die eet en drinkgoed tydens die fliek wel. Ons gaan gewoonlik vir Nachos met kaassous, maar met Ramadan mag mens natuurlik nie ... so 'n boer maak 'n plan. (Mag mens nog die woord boer gebruik wonder ek?)

Ons eie Nachos, kaassous en salsa!!!! Lekker. Vorige jare het ons planne gemaak wat nie so goed gewerk het nie. Eers het ons Nachos gekoop en saamgeneem in ons handsakke, maar jinne kan die pakkies 'n geraas maak en mens moet dit mos skelm doen en met die geraas kan almal vir jou kyk. Toe verlede jaar besluit ons, ons is baie slim. Eindelik moes ons dit geweet het.
VOOR die fliek sit ons die nachos in jiffy sakkies dat dit nie kan raas nie en ons neem ook lekker gegeurde vonkel water saam. Baie trots op onsself word dit uitgehaal in die fliek en niemand kan sien of hoor nie - dis nou as mens mooi toemond kou. Dan .... waterdrink en ek het my heeltemal misgis met die vonkelwater... met al die geskud in die handsak spuit die water uit toe ek dit oopmaak. Gelukkig niemand voor my nie maar ons kan skaars saggies giggel. Charmaine gee my 'n kyk asof ek iets verkeerd gedoen het en vir veiligheid maak sy haar water nie oop nie. Maar ek kry 'n kans vir 'n terugkyk ... oppad huis toe maak sy haar water in die motor oop .... en venster en alles word vol gespuit..... Wys jou net, skelm wees werk nie. Ramadan maak nie net dat baie van die moslems skelm moet eet en drink nie, dit maak tot ons skelm... Vandag gaan ons fliek sonder enige skelm planne .....dit kan dalkies boring wees.

Wat is Iftar?

Ek het julle al 'n bietjie vertel van Ramadan en hoe ek dit beleef. Een van die dinge wat ek genoem het was die Iftar ( إفطار) wat verwys na die aandete en die breek van die dag se vas gedurende die maand van Ramadan. Dit geskied direk na sonsondergang en tradisioneel is dadels en water veronderstel om die eerste ding te wees wat hulle geniet.

Dit is iets wat as 'n gemeenskap en/of familie gedoen word en almal kom graag saam om die vas te breek en te kuier. Ek het so 'n paar tente gaan afneem in die omgewing waar Moslems gereed maak om mense te onthaal en te voorsien van kos. Hierdie was 'n taamlike standaard tent. Kyk die oulike armlenings vir wanneer jy op die vloer sit.


Dis die eerste keer dat ek een van hierdie deurskynende tente sien. As julle die foto vergroot sal julle die tafels en stoele aan binnekant mooi kan sien. Kyk ook al die lugreelings en waaiers wat verskaf word om dinge bietjie af te koel.

Hierdie hengse groot tent is voor een van die paleise opgeslaan. Om 'n prentjie te kry van hoe groot dit regtig is, kyk na die lugverkoelingseenhede wat langs die tent is. Daar is tien van hulle .... dis baie lank en groot!!!

Hier is nog 'n groot voor een van die villas. Kyk die wasbakke en water wat aangelê word dat hulle hande gewas kan word. Hierdie ouens doen nie sommer iets kleins nie ne. Die gekuier in die tente kan baiekeer tot in die vroee ure van die oggend aangaan.

Die Moslems glo ook dat om iemand te voed tydens Iftar is 'n groot en goeie daad. Daarmee het ek nie 'n probleem nie, maar julle moet sien hoe die mense bakke en komme voor die hekke van die villas sit om kos te kry. Ek was nog elke keer te besig om foto's van die toue en toue mense te neem (rugby en krieket ja), maar met die neem van die tente, was hierdie paar bakke reeds voor die hek om 14:00 'n hele 4 en halfwe uur voordat die vas gebreek kan word.

Vorige jare het ek gesien hoe mense in taamlike "grand" motors, 'n entjie van die villas stop en dan hulle kinders stuur om met die bakke in die ry te gaan staan. Sê mos ons moet dit ook probeer. Dis vir my partykeer al te veel na bedel ...wat natuurlik hier verbied is. As dit behoeftige mense is, is dit 'n ander saak. Miskien is dit die buurvrou wat wil sien watter kos die ander ouens vir aandete het :-).

Ek het julle mos ook vorige keer gesê dat daar baie keer kos by die moskees verskaf word. By die Lootah Moskee in Deira Dubai gee hulle daagliks vir 4800 moslems kos tydens Iftar. Hierdie tradisie het 30 jaar terug begin toe daar vir 150 honger aanbidders by die moskee kos gegee is en vandag stroom duisende, selfs van nabye Emirate soontoe om te gaan eet. Plaas hulle die taxi geld gebruik om kos te koop.

Maar soos so baie tradisies hier in die UAE is selfs die Iftar besig om te verander. Elke hotel het 'n spesiale aanbieding van etes waarvoor mens ten duurste betaal. Een goeie ding gedurende Ramadan is die feit dat daar nie alkohol gedrink mag word nie

Weg met die dadels en water, dis fancy buffets en goeters. Vanaand gaan ons Vrouegroep ook 'n Iftar bywoon, en ek vertel en wys julle more hoe dit gegaan het. Wat ek wel weet is dat ek nie daai bedrag gaan betaal vir dadels.... wat ek nie eet nie!

Dis Ramadan in die land van die Kamele

Hierdie beriggie het ek seker al honderd keer begin. Ek wou julle vertel van Ramadan en waaroor dit gaan en waarvoor dit staan met feite en alles, maar dan onthou ek van my ervaringe die afgelope paar jaar hier en dis alles vir my so 'n klug. Toegegee daar is baie moslems wat dit ernstig opneem, maar mens doen mos nie net goed en wys hoe sterk jou geloof en wilskrag is eenkeer 'n jaar nie. Dis mos 'n permanente leefwyse .... So ek gaan vertel van hoe ek die maand van Ramadan hier ervaar en seker 'n feit of drie iewers ingooi.

Vir my is die vasmaand hoofsaaklik 'n ongerief omdat mens nie kan gaan koffie drink nie, en vir die moslems is dit doodeet. Maar dis dan die maand wat hulle vas sal julle sê ... ja dis die maand wat hulle vas, maar as mens sien wat gebeur sal julle ook met my saamstaan dis eintlik 'n groot vreet kompetisie. Praat met oa van die jongmense en hulle sal jou vertel dis 'n maand waarin hulle gewig optel en hulle hou daarvan niks.

Hierdie is my tiende Ramadan en ek moet erken dat dit beter word met die tyd. Ek onthou daardie eerste jaar, dit was in Desember (volgens hulle kalender skuif dit elke jaar 11 dae vorentoe). Hier kom ons in 'n vreemde land aan wat ons eers moes plot op 'n wêreldkaart, dis warm al is dit eintlik winter en ons het niks behalwe 17 bokse met ons goed in en ken niemand. Toegegee ek het uitgesien om alles van vooraf nuut te koop. Maar dis Ramadan en die winkels maak toe in die middae wanneer mens wil shop en dan vanaand wanneer 'n normale mens in die bed hoort, kom almal uit om te shop, eet en kuier. Mens kan ook nie halfweg tussen die inkopies stop om ietsie te eet of drink nie, want die restaurante is toe. (Daardie jare was meeste van die restaurante in die hotelle ook toe). Die kinders is kriewelrig en dors en honger en moeg - julle weet mos hoe kinders is.

Dubai was toe amper in 'n ander land met die ou paaie wat nog nie 'n agt laan snelweg was nie, en hobbels gehad het soos op 'n kameelrug elke paar meter. Abu Dhabi het niks malls en/of supermarkte gehad nie en inkopie tyd was 'n uittog Dubai toe. Ons het skaars die eerste hobbel geslaan, dan is die kinders dors en honger (bederf met al die Ultra Cities by die huis). Vandag is daar vulstasies langs die pad, maar tienjaar terug net sulke klein gat in die muur winkeltjies. Dan word daar koeldrank gekoop en hulle moet plat op die vloer in die motor sit om dit te kon drink. Groot pret vir hulle om iets skelm te doen. Daar mag niks geeet en gedrink word tussen sonsopkoms en sonsondergang nie, maar ek dink my water in die motor solank daar geen ander voertuig langs my is nie. Nie net omdat dit wet is nie, maar ook omdat ek hulle gebruike respekteer.

Jinne my kop spring na allerhande stories deur die jare. Ek sal probeer konsentreer op een...

'n Normale VAS dag vir die locals, feit en werklikheid hoe ek en ander dit ervaar.

Net na 4vm in die oggend moet hulle hulself uit die bed sleep nadat hulle waarskynlik net 'n paar uur terug daar ingekruip het. Dan geniet hulle die "Suhoor" wat die laaste maal voor die vasdag is, en dit is veronderstel om hulle vir 14 uur gevul te hou. Weet jy hoeveel jy moet eet om jou gevul te hou vir soveel ure? Skaars klaargeeet en die ou begin skree dis bidtyd.

Indien die moskee naby is, gaan almal soontoe vir "fajr" gebed. Om te vas vereis goeie disipline en om nie te eet of drink nie vra ernstige wilskrag en daarom mag ons nie eet en drink voor hulle nie - dit mag hulle in die versoeking lei. Ek sou gedink het om te vas al eet mense rondom jou verg wilskrag...maar met die dat niemand mag eet nie en hulle ook nie kos mag ruik nie, sê dit nie veel van hulle wilskrag nie. Op hierdie punt verstaan ek ook nie hoe hulle in 'n supermark kan loop, die kosse kan sien en ruik en dit hulle nie in die versoeking bring nie. Ook is hulle veronderstel om nie hulle humeur te verloor nie (die meeste padongelukkige gebeur hier in Ramadan omdat almal of vaak of ongeduldig is weens die "honger" en dit dan op die pad uithaal - julle moet hierdie mense sien bestuur - staan terug SA taxi's) en hulle moet hul weerhou van slegte gedagtes...(ek veronderstel hier is dit elkeen vir homself. Ons weet dat ons gedagtes elke dag moet goed wees)

Kantoorure is korter en dit beteken hulle werk harder. Groot grap, hulle kom nog later by die kantoor aan, doodmoeg van heelnag se eet en sit en slaap agter die lessenaar. Bitter min werk word gedurende Ramadan gedoen en of voltooid.

Maar hulle kan ook nie lank sit en slaap in die kantoor nie, want daar moet gedink word aan die beplanning van "futoor/iftar" die breek van die vas, met kos natuurlik. Oor die Iftar wil ek julle nog in 'n ander beriggie vertel.

Na werk is hulle veronderstel om die tyd in gebed en met die lees van die Quran besig te wees. Maar baie mense loop in die dorp rond en die vroue is besig om die kos voor te berei. Ek wonder partykeer of hulle mag proe of die kos goed smaak gedurende Ramadan.

Dis 'n tyd van besoeke aan familie en vriende en hulle stuur ook van hul gunsteling disse na familie en vriende. Baie gesinne voorsien behoeftige mense ook van kos. Hiervan wil ek ook nog meer vertel met foto's. Julle moet sien hoe mense bakke voor hekke sit en toue staan om kos te kry. Ek het al gewonder of ek dit nie ook moet probeer nie net om te proe watter kos hulle het. Baie moskees sit ook kos uit vir mense om die vas te breek na bidtyd. Tradisioneel word die vas met dadels en laban gebreek. Ramadan bring mense nader en dis die tyd waarin ou vete's opgelos moet word.

Wanneer al hierdie verpligte formaliteite vir die dag afgehandel is, begin die pret vir hulle eintlik. Vriende en familie kom bymekaar in koffie winkels en shisha kafees. Baie mense het tente voor hulle huis opgeslaan waar die mans tot ligdag kuier en gesels en heel waarskynlik bietjie peusel aan kos ook.

Almal raak stil rondom 2am ... net sodat almal weer 4am kan wakker word om te eet. Gelukkig kan ek nog slaap.

Ek hoop dis vir julle ook interessant en ek vertel gou van die Iftar, kos aan minderbehoeftiges, Ramadan in die skool en enigiets anders wat in my kop spring hieroor.