Berge en dale

Wat’s die prentjie wat jy kry wanneer jy dink aan ‘n woestyn? Sand, sand en nogmals sand? Miskien het van my stories al 'n ander prentjie in jou kop gesit :-). Maar komende van die Kaap is 'n groot gemis die berge!! Ry mens so bietjie weg van ons dorpie na van die ander in die emirate is daar egter 'n berg of drie te sien, veral naby wadi's.

Vir die wat nie weet nie, ‘n wadi is ‘n plek in die berge waar daar deur ‘n natuurlike proses ‘n pad, vallei, ens ontstaan. Dis nou nie soos daai foto'tjies geneem in ons mooi land nie Sonja, maar tog het dit sy eie bekoring.

.

Water van opvanggebiede hardloop hier deur na enige plek waarnatoe die water wil gaan, soos die see, ‘n dam of net die vlakte. Dus is ‘n wadi soort van ‘n waterpad. Vir die arabiere beteken wadis egter valleie.

‘n Ander “tradisie” hier is dat wadis gebruik word om van een plek na ‘n ander tussen villages en berge ens te ry. Hier in die UAE is baie wadi’s waarvan party nog gereeld in vloed is en ander weer heeltemal uitgedroog het.

Van die mooiste natuurskoon hier in die UAE, is te sien wanneer mens deur so ‘n wadi ry.

Hulle se as mens deur ‘n wadi ry is dit soos ‘n reis deur die geologiese geskiedenis van die aarde.

James ek kan sien jy en Leane slaan hier tentjie op sodat sy na die klippies kan kyk :-).

Dis natuurlik 'n gewilde naweek aktiwiteit hier. Kyk net daai kamp!

En een van die redes is beslis die poele waar mens kan swem.

En by party hoef mens nie eers te kommer oor die ablusiegeriewe nie :-). Kompleet met plastiek afvoerpype en alles.

Natuurlik moet mens versigtig wees waar jy kamp opslaan want dit gebeur baie dat dit hoog op in die berge reen en dan kom die water sonder waarskuwing by die wadi's af. So 'n wadi besoek is beslis iets wat jy ten minste een keer hier moet doen.

Dankie Edna vir die foto's ek waardeer.

Nie so lank terug nie

Elke liewe dag wat ek in die dorp ry is daar iewers nuwe geboue wat opskiet waar ek nie eers geweet het hulle bou nie en Abu Dhabi ontwikkel met die spoed van wit waks. Net gister staan ek op die boonste vloer waar ons hare laat sny en sien hoe "nuwe" ou geboue platgeslaan word sodat groter geboue gebou kan word. Om die waarheid te se mens kan amper nie meer onthou wat daar was nie. Wys net dat mens so gewoond raak aan alles en later net nie meer die mooi geboue, tuine en goed sien nie. In die afgelope jare van blog het ek al baie van die mooi winkelsentrums en geboue en goed van die dorp vertel en selfs 'n bietjie van die ou Abu Dhabi. Vandag is ek regtig spyt dat ons nie meer van die dorp en geboue afgeneem het toe ons gekom het nie want alles het verander.

Die van julle wat nie weet nie, Abu Dhabi is mos 'n eiland en hoofstad van die UAE. Almal weet waar "Dubai" is (of hoe skryf almal nou weer in SA, Doebai :-) - dog ons het geleer op skool plekname verander nie) maar min mense weet van Abu Dhabi. Ons self moes op die internet kyk voordat ons baie jare terug hierheen gekom het. Nie eers 40 jaar terug nie was dit die Cornish van die dorp.

Ek lees in 'n baie interessant boek wat deur 'n ou wat hier grootgeword is geskryf is, dat dieselfde landjie wat ons land so aangeval het en mense in konsentrasiekampe geplaas het, het ook hier kom oorneem destyds nadat olie ontdek is. Hulle het die geld "beheer" en vir baie jare het Abu Dhabi sonder die nodige mediese fasiliteite, onderwys, elektrisiteit ens. moes klaarkom totdat die toe heerser besluit het om beheer oor hulle eie land te neem. Saam met dit het die ontwikeling begin. Die Cornish in die jare daarna.

Die heerser van die land het toe vir elke plaaslike inwoner van die land, 2 plotte grond verniet gegee. Een in die dorp in een verder uit die dorp wat vandag die industriele gebied is. Hierdie is 'n storie op sy eie wat ek later sal vertel. Daar is toe besluit om die Cornish projek aan te pak en 'n nuwe een te bou.

Soos altyd wanneer hulle 'n nuwe pad bou, word die omgewing met fonteine, parke, ens. saam met die projek gedoen. Hierdie is nog in die begin maar kan mens reeds sien waar die bekende volcano fontein en ander bekende bakens sou wees.

Maar steeds was dit nie goed genoeg nie en in 1998 word nog 'n nuwe Cornish gebou en van hierdie een is ons deel van die bouery en onthou mens baie. Julle ouens wat al lank hier is sal dit seker onthou - Kathy julle het mos net 'n kort tydjie na ons hier aangekom, het julle nie 'n foto van daai ronde pizza plek wat op die Cornish gesit het nie? Of die ou Co-op?

Saam met die nuwe paaie het ook 'n nuwe strand en baie bome gekom. Daai groen strook bome bo regs in die foto, is waar die pad/brug nou oorloop na die Marina Mall wat toe nog nie eers begin is nie. Die strand na daardie strook is waar die bekende Emirates paleis nou gebou is.

Op hierdie strook sand het die kinders vroeer jare baie vlieers gevlieg en gespeel. Kyk net hoe klein is Nelmari en William nog hier. James staan ver regs in die prentjie ook besig om te speel.

En om van die Cornish te vertel, moet mens die aaklige versierings oor die paaie in Desember ook noem. Wie van julle onthou dit? Hierdie was een van die beter enes, party was regtig verskriklik oordoen en lelik. Dit was om National Day te vier.

.

Dit was die foto van Abu Dhabi wat almal kom neem het en die dorp en Cornish wat ons leer ken het. Daai bal op die hotel en die een op Etisalat was ons baken en as mens verdwaal het, kon jy net die bal soek en weet waar jy min of meer is.

Die dorp het "gesettle" en die paaie het gebly waar hulle is. Ons het selfs 'n teetuin gekry langs die see waaroor ons dames baie opgewonde was. Links op die foto met die groen sonkappies op die vensters. Ek het ook al vertel hoe Charmaine met 'n kuier daar langs die water gestaan het en van haar foto's in die water geval het.

Die Cornish was nou mooi groen met baie bome vir skadu en plekke om te loop. Nelmari 'n bietjie ouer saam met Jessica besig om deel te neem aan 'n Terry Fox wedloop op die Cornish

Soos ek gese het daar was lekker plekke en mens kon so al langs die see loop. Hier kon ons ook 'n boot kry om oor te vaar na Lulu eiland vir 'n lekker braai of swem - daar was nog niks op Lulu eiland nie en mens kon sommer oorgaan. Links is daar sulke glaskoepel goed waar jy kon wag vir die boot.

Maar iemand het weer 'n jeuk gekry en die Cornish moes weer verander word - so saam met die bou van Marina Mall. Hierdie foto is op presies dieselfde plek as die boonste een geneem, maar hier kan julle sien ons sal nou bietjie langer vir 'n boot moet wag want weer is 'n groot deel van die see droog gele.

Van die nuwe Cornish het ek vertel en foto's gewys en nou is dit een groot snelweg met 6 lane beide kante toe maar steeds lekker plekkies om te loop, mooi parke en tuine en selfs 'n nuwe strand. Nelmari nou heelwat groter stap langs die Cornish. Ek dink nie daar is meer baie water oor om nog 'n Cornish te bou nie, so miskien eindig die storie nou hier.

Dadelfees in Liwa

Eers moet ek vir die ouens wat nie weet nie, se “ek eet nie dadels nie”. Die naaste wat ek aan ‘n dadel kom is wanneer ek ‘n snytjie dadelbrood met dik botter op sal eet. So skoon of selfs opgedollie met sjokolade en neute vat ek nie aan dadels nie. Dus was daar ‘n wenkbrou of twee gelig toe ek se ek wil gaan kyk wat by die dadelfees gebeur. Dit is die 5de dadelfees wat gehou is in Liwa deur die Abu Dhabi Culture & Heritage komitee met die doel om die “heritage” van Abu Dhabi te probeer behou.

Ek moet eers vir julle vertel dat Liwa Oasis so 150 km van Abu Dhabi is op die noordelike grens van dike Rub Al Khali woestyn. Daar is so rondom 50 klein nedersettings oor ‘n afstand van 100 km. Ry mens verby die Muzayri oasis is jy lekker reg binne in die woestyn. Dit word ook die “empty quarter” genoem en is reg langs die grens van Saudi. Terloops as jy sou wou kan mens daardie grens of duin oorsteek, aangesien daar geen grenspos is nie. Ek wat nog altyd gedink het die heerser-familie kom van Al Ain het nou geleer dat die Liwa Oasis die geboorteplek van die oorspronklike heerser-familie van Abu Dhabi en Dubai is en in 1793 het die Al Nahyans eers hulle huis van Liwa af geskuif Abu Dhabi toe.

Die terrein/tente is spesiaal vir die geleentheid opgeslaan en anders as by ons huis op die oomblik, het hulle lekker aircon. En orals is net dadels en dadels en nogmaals dadels. Ek kry ook kans om met een van die arabiere te gesels oor die verskillende soorte en hy vertel my van die Khalas, Saqi, Majdoul, Fardh, Barhi en Dabbas dadels en watter een nou die lekkerste smaak. En ek het gedog dis almal sleg. Een van die hoofdoele van die fees is om die kultur van die palmbome en dadels te laat “herleef” en dadelkwekers kan hulle dadels inskryf vir die kompetisie. Vir die eerste keer kon die mense die dadels wat ingeskryf is ook proe. Die Arabiere voel in die gesig gevat as mens nie ‘n “geskenk” – in hierdie geval dadels vat en dit eet nie en ek het al my wegsteek vernuf moes gebruik dat hulle nie sien ek vat en bere dit om later vir Nelmari, Eddie of Charmaine te gee nie. Die koekies het ek darem geeet so al rondom die binneste dadelstuk :-)

.

Met ons besoek was daar reeds 57 dadelboere wat ingeskryf het vir die eerste kompetisie wat hulle “Bou Maan” noem. In elke kategorie sal daar 15 wenners aangewys word. Die eerste drie plekke in elke kategorie sal elkeen ‘n 4x4 landcruiser wen en die res van die deelnemers sal ‘n bedrag van dhs3.5 miljoen deel. Daar is vyf kategoriee en dus 15 Landcruisers wat wag om ‘n baas te kry. Hulle staan buite die tent met groot strikke om en wag – laaste foto.

As ek nou my eie storie in die rede kan val. Mens ry 3+ uur vanaf Abu Dhabi soontoe en nog langer vanaf Dubai. So kom Charmaine se broer en sy gesin ook deur om die festival by te woon en arriveer so 11 uur waar hulle voorgekeer word saam met ander deur sekuriteit – een of ander royal kom besoek en hulle moet maar 4 uur terug kom – kan jy dit glo!

Ons het gewonder hoekom die mense by die ingang voorgekeur word, maar op ‘n manier het ons verby geglip en ingekom. Miskien met al die kameras het hulle gedink ons is van die pers :-). Hierdie ouens voel net niks vir niemand nie en as die royals kom, moet almal spring. Ons het so saam-saam met die belangrike gas die uitstallings bekyk sonder om in sy pad te wees :-).

Dis nie al wat daar gebeur het nie, ek vertel later.

Lekker dag..

Waarmee speel die kinders hier

Soos julle almal nou al weet is geld nie 'n kwessie by die plaaslike of "locals" soos hulle genoem word nie. Die kinders is seker van die moeilikste, ongehoorsaamste, onbeheerbare kindertjies wat mens kan raakloop, juis omdat daar geen disipline in hulle vroeer jare mag wees nie. Self maak hulle ook nie regtig hulle kinders groot nie, dit is die kinderoppasser se rol, maar sy of hy mag nie met hulle raas nie - dus het ek al gesien hoe 'n kleintjie sonder om te dink 'n oppasser verskeie kere deur die gesig klap en dis maar ok. Hulle kry ook enigiets wat hulle wil he om mee te speel en net van die beste. Daaroor en partytjies kan ek seker 'n boek oor skryf ... maar ek dink so stadigaan besef die "ouer" geslag dat hulle kultuur en geloof (die twee loop maar hand-aan-hand hier) aan die westerlinge blootgestel is. Met die onlangse "Toy fair' het hulle ook saam met al die nuutste speelgoed op die mark, 'n bietjie van hulle "eie" speelgoed ook gehad. Miskien is dit 'n plaasvervanger vir lego of miskien vir 'n 3D legkaart, maar jy kan die moskee bou sou jy wou. Of wat van 'n piramide vir 'n pophuis? Verkies jy iets kleiners, kan hierdie handpoppe ook vir groot vermaak sorg. Die gewildste "plaaslike" speelding op die oomblik in die land is die poppe met name soos Um Saloom, Um Allawi en Um Saeed van die Freej vroue. (Volgens Nelmari beteken Um ma). Daar is tot 'n TV reeks hieroor en dis baie gewild. Hulle het 'n webblad ook waar mens meer van die karakters kan lees hier. Wat vir my interesant is, is dat die poppe ook sulke bullbars voor hulle gesigte dra soos die vroue hier wat beteken hulle spot eintlik met hulle self. Wie van julle ken die First Born poppe? Hier kry mens hulle ook met 'n witrok.:-) en dan is daar die eweknie vir die Barbie en Ken poppe. Dit kan mens nie baie kos aan popklere met alles wat swart is nie. Kyk die Fatima barbie het selfs henna op haar hande en voete. En Abdulla het sandale by sy witrok aan. Is dit nie oulik nie? My dogtertjie speel nie meer met poppe nie, so as daar enige dogtertjie is wat die stelletjie wil he moet julle my laat weet. Dan natuurlik niks met die toy fair te doen nie maar ek is ook verras met 'n nuwe speelding as 'n vroee herdenkingsgeskenk en om op die vroue Skotland/Ierland trip te neem. Pasop Annie en Charmaine (vir die toer) en almal rondom my nou, want die mamaratzi gaan nog meer foto's neem .... Kyk my nuwe Nikon D40.

Die woestynsand hier

Die laaste paar weke het ons nou nie 'n keuse van woestyn toe of nie want die woestyn kom na ons toe. Met die ernstige shamal wind word die woestyn dorp toe gewaai en alles is bo en onder vol sand - een van die dinge wat mens maar moet verduur en geen blink of hoe geboue of geld kan dit wegvat nie. Kyk hier hoe dit verlede jaar hierdie tyd gelyk. Na James se foto en die kinders wat so op die sandvlaktes moes slaap die afgelope naweek het ek geen ander keuse as om oor die woestyn te dink nie. Een van die "in" geskenkies jare terug was 'n raampie met die 7 sande van die UAE en vandag nog kry mens dit in die winkels. In 'n lang verduideliking beteken dit dat al 7 die emirates se woestynsand verskil in kleur van die ander. Nou hoe wil mens dan vra en is dit rerig egtig?! Ek het tussen ons ou en nuwer foto's gaan krap om te sien of ek 'n verskil kan opmerk. Die sand van Ras Al Khaimah is wit en selfs die berge daar vertoon wit.Kom mens by Abu Dhabi dan is dit ligte rooi en dis veral opmerklik as mens in die rigting van Al Ain ry. Natuurlik is daar ook al in die woestyn naby Abu Dhabi rondgejaag en vasgesit in wat vir my maar na witsand lyk. Na Dubai toe kry mens regtig rooi duine en is een van die grootste duine waarop 4x4's met toeriste jaag dan ook bekend as die "Rooi duin". Nelmari was klein en wou so graag daardie baba kammie he toe die foto geneem is. Reg langs Dubai le Sharjah ('n baie deurmekaar emirate) en sy sand is bruin. As mens na die naweek se sand op die kampterrein in Sharjah kyk, lyk dit maar ook rooierig vir my. 'n Paar km verder is dit Umm Al Qwain en volgens die raampies en botteltjies en kaartjies is die sand veronderstel om blou te wees. So het ek dit nog nooit gesien nie, maar miskien as mens jou verbeelding gebruik kan dit blou wees of hoe. Ajman is roomerig en hier waar hulle nog besig was om die souk te bou is die sand nogal roomkleurig. Fuijerah se sand is swart en hier waar James en Leane by die see in Fuijerah staan kan mens dit nogal duidelik sien. Is dit nie besonders dat elke plekkie sy eie kleur met of sonder verbeelding het nie? Nou wat ook al die regte kleure is, die sand wat nou in ons monde waai met die shamal is kleurloos maar dit proe soos sand en die suidooster in die Kaap en Augustus winde in Gauteng is 'n vulletjie teen dit.