Kersprogram by die Afrikaanse Kerk

Mens weet die einde van die jaar is op jou as die Kersprogramme begin. Verlede Vrydag (ons Sondag hier) het die Afrikaanse kerk hulle Kerssangaand gehou en ons kindergroep was deel van die verrigtinge.

Ek en Charmaine het stukkies voorgelees en die kinders het die adventkerse van hoop, liefde, vrede en vreugde aangesteek. Ds Gert het die "diens" gedeelte gedoen en die gemeente het al die feesliedjies tussen-in gesing.

Die Abu Dhabi deel van die gemeente is nog nie so groot nie, maar getalle moet nie saak maak nie. Hier sluit ons af met Stille Nag. Altyd spesiaal om dit te sing, en meer in 'n vreemde land as mens dit in Afrikaans kan sing.

Gaan loer bietjie by

http://adkindergroep.blogspot.com/2007_11_01_archive.html

en kyk die storie van die sangdiens. (As jy op die link kliek sal jy direk by die storie uitkom.)

Ons woon konferensie by

Die volgende vier dae woon ons 'n Kinderbedieningskonferensie in Dubai by. Dit word gereel deur die Beyond Words groep en die aanbieders kom van Engeland, Amerika en Australia. Die Engelse is nogal groot mond oor die rugby en nie eenkeer word die Springbokke genoem nie. Kom more gaan ons hulle beslis reghelp.

Hier is almal besig om te registreer vir die konferensie. Ek vermoed dat ons meer as 300 mense hier is. Groepe van Bahrain, Qatar, Oman en Lebanon het gekom om dit by te woon.

Kostyd voordat die konferensie begin en almal wag geduldig in die kosry.

Ons groep vanaf ECC Abu Dhabi sit saam by die tafel en eet. Soos julle kan sien is baie lande hier verteenwoordig, maar uit die groep van 11 is daar darem 3 Suid-Afrikaners.

Vol glimlagte sit die klomp en wag vir die konferensie om amptelik te begin. Die twee rye is van die ECC kerk in Abu Dhabi se verteenwoordigers.
Die eerste twee manne wys wat ons in die drama werkswinkel sal leer, dit was verskriklik oulik. Charmaine gaan hierdie ene bywoon en hopelik sal ek julle daarvan kan vertel.
Hierdie man met sy kameel bied "puppetry" aan.

Die voorskou van die "Clowing" was uitstekend!
Hierdie man kan 'n storie vertel ek belowe. Almal in gehoor neem deel terwyl hy alles drie keer herhaal en met bewegings doen. Ek hoop om by die werkswinkel in te kom.
Hi Tech is hierdie werkswinkel en sal my sommer baie slimmer maak met die rekenaar vir al die aanbiedings vir die kindergroepe en blogs.
Dan is dit tyd om te luister wat gedoen gaan word in die Worship & Praise werkswinkel. Die twee het die hele groep aan die sing en beduie gehad.



Nog een wat goed afgegaan het is die ""Keep Fit". Almal het saam beweeg.
Die buikspreker met sy Duggee (handpop) was net so goed.

Ons maak amper 'n uur later as beplan klaar, maar almal sien uit na more en al die nuwe dinge wat ons gaan leer. Miskien kry ek nie eers kans om gereeld te blog nie, maar ek sal julle graag wil vertel hoe die werkswinkels afgeloop het.

Ons kinders perform....

By die tyd weet julle al dat ek erg is oor ons dansers by die Kindergroep is. Gister het ons bietjie rondgery in die dorp en daarvan vertel ek oor die volgende dag of twee, en gisteraand moes die meisies by die nuutgestigte Afrikaanse Kerk gaan sing en dans. Na die gejaag om betyds daar te wees na die dag se uitstappie was ek maar taamlik warm toe ons eindelik daar opdaag. Moet sê dat die bekommernis van "hot flashes" daar was gedurende die diens toe die sweet my letterlik afgeloop het. Verligting GROOT!!! toe ek sien ander suffer net so en dis eintlik die A/C's wat nie so goed werk nie.

Ons meisies het gedurende die week vir een oefening gekom, so saam met die kitaarlesse en ons was effens tevrede na die halfuur van sing en dans.

Julle weet mos met kinders kan mens hulle alles wys en alles leer en alles sê maar wanneer hulle eers daarvoor staan, kan ons net toekyk, want dis wanneer hulle in elk geval doen wat hulle wil.

Maar as julle kyk na die foto, sal julle sien dat dit in elk geval nie saak maak nie, want die dogters is besig om hulle self te geniet.

Dominque het haar eie dans gehad vanaand. Die lekker van alles is, is dat die ouers ongeag van wat ons kinders daar voor doen, dink en weet dat my kind baie oulik is en dat ek vir haar baie lief is. (dis nou hulle kinders want myne is km te lank en groot om saam met hulle deel te neem)
Leana vat so effens 'n breuk net om te sien wat die groter dogters doen. Sy is al deel van ons groepie vandag sy drie is en geniet die saamsing en dans. Die ander dogters is almal 8 & 9 jaar oud. (Die happe uit die foto's is die tannie wat voor die kamera gesit het, mens kan nou nie juis in die kerk opstaan en foto's neem nie)
Die Afrikaanse kerkdiens word by die Gholfbaan buite die dorp gehou en is so twee/drie maande terug in Abu Dhabi begin. Die rede vir ons kinders se omtrede was om te "adverteer" dat ons Musiek Kinderbediening ook vanaf volgende week by die Afrikaanse Kerk gaan begin!

Ons is opgewonde oor die geleentheid. Bid vir ons!!!