Hompe rys, bietjie vleis en bene oor en oor en oor

Na ons baie uitputtende oggende wat eers half twee oor was, was dit tyd vir middagete. Die eerste dag het ons die kos so geloer en gesien dis BAIE arabies en indies. Ok nou wat beteken dit sal julle vra...Ons het twee keuses slaaie, 'n gemengde een (nie soos julle aan gemengde slaai dink nie) en hammous, arabiese brood en dan is daar drie warm bakke - een met hoender, een met mash en een met baie rys met stukkies vleis in. Die nagereg is rooi jellie en wit goed wat dalkies vla kan wees. Wat's die probleem sal julle vra? Niks fout op eerste dag, maar met die volgende middagete staan daardie drie silver bakke weer daar ... en met een kyk besluit ons McDonalds net om die hoek vir middagete. Almal vra waar was julle en ons besluit om aandete maar weer saam met die groep te eet. Genade tog daar staan dieselfde slaai en drie bakke alweer en na 'n vinnige verdwyingstoertjie (nie op konferensie geleer nie) gaan eet ons by ons hotel. Die volgende oggend kla die organiseerders net 80 van die 280 mense het daar geeet ....ek wonder of hulle nie wonder hoekom nie? So kom middagete weer en ons probeer maar saam eet ... ek hoef nie te sê dis dieselfde bakke nie. Party van ons ontdek beentjies in die vleis en ons kan nie die dier identifiseer nie ....Gelukkig kan ons in Afrikaans kla en ons besluit om die volgende dag se middagete by die mall te gaan eet - kan julle glo die Battuta Mall is 3 min van ons, en daar is niks tyd om soontoe te gaan nie.

Die stukkie klink nou na baie herhaling, maar die aandete lyk weer dieselfde en ons besluit om maar iewers iets te eet waar mens groente of iets anders as rys kan kry. Om hierdie baie lang storie kort te maak, die volgende dag se mall eet, val toe ook deur die mat, toe die groep bymekaar wil kom reg in die middel van die middagete breuk en ons is weer aangewys op die drie silver bakke. Ons staan so 20ste in die ry en met die een oog sien ons iets anders ..... chips in die een bak, snitzel in die ander en die gewone rys en vleis. Dankie tog..... maar o wee ....die chips is op toe ons daar kom en die snitzels min, maar darem kry ons. Ons sit aan die tafel van ons groep, baie indiers, 3 Suid-Afrikaners, een Asier, een van Russies oorsprong en een Amerikaner. Eersgenoemdes se borde is tot bo en hoer vol met 'n ekstra bordjie vol snitzels. Die Amerikaner kom sit maar sy was te laat vir snitzels maar kla nie. Ek's nogal omgekrap oor die ongeskiktheid (aangesien mens nie varkerig in hierdie land mag sê nie) van die hompe kos terwyl ander nie kry nie. Dan sê die dame langs Charmaine ewe, "portions too big" terwyl sy die self ingeskep het en sommer twee gevat het. Onmiddellik besluit ek dat Saterdag met die terugvoering ek beslis nie die koeksisters gaan uithaal nie, netnou bly dit ook op bordjies agter soos die snitzels terwyl ander nie kan eet nie.

Maar ons het nie net geeet nie al klink dit so. Na middagete het ek "tricks" vir 'n sessie. Sekere lede van die groep is so vol geprop van die kos dat hulle vas aan die slaap sit en wieg. Nie eers die ou se kunsies hou hulle wakker nie. Hier oefen 'n groep hulle toue en dit lyk amper soos 'n Voortrekkerkamp.Ek het die sessie geniet en hoe om die kinders stories te verstel soos bv van die Drie-enige God dmv toue. (Kyk op kindergroep blog volgende week) Die tieners moet weet, hulle is in vir 'n toertjie of twee.

Charmaine het die clowing bygewoon en sy kom trots vir ons haar "hond" met ballonne wys. Die groene is haar hond en die bloue hoe dit moes lyk. Seker sy sal dit mooi vir ons verduidelik. Na die sessies was dit tyd vir Vrae en Antwoorde by die verskillende kursusse en dan aandete. Die aandprogram het 7 uur begin as ons gelukkig was en daar was allerhande "skits" deur die kursusgroepe, sang en oordenking. Teen tienuur was die dag so te sê klaar. Ek's baie dankbaar dat ons wel in 'n hotel gebly het, en nie op die perseel geslaap het nie. Daardie arme mense het op 'n opblaasmatras geslaap en tussen almal net twee storte gehad. Party was maar erg knorrig aan die einde van die konferensie. As oud Voortrekkers het ons ons dae van grondslaap gehad, en as daar kinders was, sou ons saam met hulle in ongerief gebly het, maar as dit nie nodig is nie .... dan is 'n bed en stort opsie baie baie beter. Die kerkkompleks is egter baie oulik en ek vertel julle volgende keer kortliks hoe dit daar lyk.

Beyond Words Konferensie - 1

Soos die van julle wat gereel lees weet, het ek gedurende die Eid vakansie (lang naweek) 'n jeugkonferensie in Dubai gaan bywoon. Wat 'n ondervinding! Daar is so baie wat ek kan en wil vertel maar sonder om te dupliseer...so vir die terugvoer van die sessies wat ons bygewoon het, as daar van julle is wat wil lees en leer, loer gerus oor die volgende week of twee by ons kindergroep blog www.adkindergroep.blogspot.com in en lees 'n volledige beskrywing van die lesse en wat daar gebeur het.

Die konferensie Beyond Words word deur die Le Grain de Ble groep (van Switzerland)in samewerking met die Gulf Bible Society gereel. Hierdie ouens se basis is in Lebanon en is dit die vierde konferensie wat hulle reel ....die voriges het oa plaasgevind in Syria, Jordan en Baghdad kan julle glo?!? Die vereeniging het verskillende vertakkings waarvan die konferensie vir opleiding aan leiers wat met kinders werk een is. Die ander een is om kampe te reel en met kinders van spesifiek oorloggeteisterde lande op die kampe te werk. Ek en Charmaine is genader en wie weet dalkies het ons 'n kans om binne die volgende jaar op een van die kampe te gaan werk ....!!!
Daar was 9 rigtings waaruit ons kon kies, soos ek reeds vertel het en daarna woon jy elke dag een van die sessies by. Die aanbieders het van die Amerika, Engeland en Australia gekom. Die dag programrooster was redelik dieselfde en dit sluit die kos in (daarvan moet ek julle vertel).

Ons oggend program het begin met die Praise & Worship deur verskillende kerke wat die konferensie bygewoon het, dit sluit die Roomse en Arabiese kerke in.

Dit was ongelooflik om Arabiese jongmens te hê wat die sang lei. Ons ken Arabiese kinders meestal as moslems.

Ek hoef julle nie te vertel dat die Roomse Kerk se jongmense my net so uitgeboul het nie. My beeld van hulle dienste en sang was niks soos wat ons tydens die konferensie ervaar het nie. Hulle het dieselfde liedjies gesing wat ons in die kerk sing wat my net weer laat besef het dat sonder dat mense weet, God mense wat lief is vir Hom tog nadertrek om dieselfde te dink en voel. Die oggend "preek" is deur 'n Engelse omie gedoen en hy uitstekend. Die mense het behoorlik aan sy lippe gehang en sy stories en lesse baie geniet. Ons het ook die Just4kids gehad wat 'n poppespel boodskap gelewer het.
Daarna was dit 'n geskarrel na jou aanbieding toe. Mens kon nie vir 'n spesifieke kursus inskryf nie en elkeen het beperkte sitplekke gehad, so jy moes regtig hardloop om jou plek te boek om die sessie by te woon. Alhoewel ek meer vir 'n vaste program met reels en lesse is, was dit 'n goeie manier om die ouens op "Arabiese" tyd betyds te maak. Na die eerste les het die ouens wat drentel en hulle tyd vat geleer dit werk nie. My eerste sessie van elke dag was Storievertel! Laat ek julle vertel dat dit nie net normale storievertel was nie, hierdie Amerikaner wat in Engeland bly was uitstekend. Hy het ons ouens in die groep laat rolspeel en kans vir uitsit was daar nie. Ons was skilpaaie, leeus, sterretjie, Jerigo se mure en allerhande goed. Luister bietjie hoe vertel hierdie man 'n storie .....

Vir meer oor die sessie lees die kinderblog later die weekMy tweede sessie van die oggend was Hi-Tech. Nooit te oud om te leer nie het ek regtig "kennis gemaak" met my ou skootrekenaar. Ek het nie eers geweet dit kan al die goeters doen nie. Hier het ons spesifiek gekyk hoe mens jou lessies vir jou kinders op verskillende maniere kan aanbied. Ek het geleer slides maak met prentjies, bewegings en video clips, hoe om rolprent, liedjies en geluide op te sit, hoe om speletjies te maak vir die les en oooohhh hoe om met my "bloutand"(dit klink nie goed nie ne) foon, die rekenaar en slides van 'n afstand te beheer. Ek's nou eintlik te slim vir myself en te gevaarlik vir die rekenaar dink ek. Meer hieroor met oulike websites wat julle kan gebruik, op die kinderblog later.

Dan was dit tyd vir middagete en dit met die res van die middag regverdig hulle eie blog.

Ons woon konferensie by

Die volgende vier dae woon ons 'n Kinderbedieningskonferensie in Dubai by. Dit word gereel deur die Beyond Words groep en die aanbieders kom van Engeland, Amerika en Australia. Die Engelse is nogal groot mond oor die rugby en nie eenkeer word die Springbokke genoem nie. Kom more gaan ons hulle beslis reghelp.

Hier is almal besig om te registreer vir die konferensie. Ek vermoed dat ons meer as 300 mense hier is. Groepe van Bahrain, Qatar, Oman en Lebanon het gekom om dit by te woon.

Kostyd voordat die konferensie begin en almal wag geduldig in die kosry.

Ons groep vanaf ECC Abu Dhabi sit saam by die tafel en eet. Soos julle kan sien is baie lande hier verteenwoordig, maar uit die groep van 11 is daar darem 3 Suid-Afrikaners.

Vol glimlagte sit die klomp en wag vir die konferensie om amptelik te begin. Die twee rye is van die ECC kerk in Abu Dhabi se verteenwoordigers.
Die eerste twee manne wys wat ons in die drama werkswinkel sal leer, dit was verskriklik oulik. Charmaine gaan hierdie ene bywoon en hopelik sal ek julle daarvan kan vertel.
Hierdie man met sy kameel bied "puppetry" aan.

Die voorskou van die "Clowing" was uitstekend!
Hierdie man kan 'n storie vertel ek belowe. Almal in gehoor neem deel terwyl hy alles drie keer herhaal en met bewegings doen. Ek hoop om by die werkswinkel in te kom.
Hi Tech is hierdie werkswinkel en sal my sommer baie slimmer maak met die rekenaar vir al die aanbiedings vir die kindergroepe en blogs.
Dan is dit tyd om te luister wat gedoen gaan word in die Worship & Praise werkswinkel. Die twee het die hele groep aan die sing en beduie gehad.



Nog een wat goed afgegaan het is die ""Keep Fit". Almal het saam beweeg.
Die buikspreker met sy Duggee (handpop) was net so goed.

Ons maak amper 'n uur later as beplan klaar, maar almal sien uit na more en al die nuwe dinge wat ons gaan leer. Miskien kry ek nie eers kans om gereeld te blog nie, maar ek sal julle graag wil vertel hoe die werkswinkels afgeloop het.