Dis hoe "experts" dit doen

Daar is die afgelope twee dae so 'n bietjie despuut oor - is sekere mense shoppers of nie en ek het gedink dit sal goed wees om vir julle te wys hoe professionele shoppers dit doen :-). Amelia en Corine was nog nooit by die Blou souk in Sharjah nie en ons durf die Dubai/Sharjah verkeer aan om vir hulle te gaan wys. Die souk is nog stil en ons begin aan die parfuum en goud kant en die dames is baie versigtig met die hele koopstorie. Amelia het egter 'n ekstra sak of twee gebring vir net ingeval. Sy is ook die een wat eerste stop en mooi goetertjies raaksien. Binne twee uur later was sy dan ook die trotse eienaar van 'n mooi blinkdingetjie. Charmaine kan nie verby 'n mooi lappie loop nie, (ja ek weet jy ook Annie) of hulle nou 70 of 700 dirham kos. Die winkeleienaar sien ons ver kom en ons word gewys hoe "suiwer" dit is, dit kan selfs deur 'n ring getrek kan word en hierdie vriendin van my word mos baie gou oorreed om iets te koop want sy hou nie daarvan om mense se "gevoelens" seer te maak en nee te se nie. Corine is die "nuwe" een by die shoppers en sy laat haar gou in die winkels inlei. Hier kyk hulle na geskenkies vir die vakansie huistoe in Julie. Maar kom kyk nou by 'n ekspert .... sien jy pak alles so uit op die grond en dan kyk jy wat jy nodig het vertel Charmaine. En sien hoe gou kry Corine dit reg ... uitgevang!! Eintlik was ons oppad na die "ladies" toe en hierdie winkels het net voor ons ingespring. Ons kommer oor hoe skoon dit gaan wees maar die "handicapped toliet" is presies wat dit se, jy kan dit bykans nie gebruik nie so handicapped is dit. Dan is dit tyd vir ietsie om te drink want dis warrrmmmmm. Ons wag vir 'n "vrugte poustert" wat in hierdie land baie lekker is. Weer terug na die moeilike taak van shop. Watter mat sal dit wees? Die arme man gooi al die matte uit sodat hulle kan kies en ja daar word toe wel 'n ou matjie gekoop. Die dhs25000 een sal miskien nog eendag gekoop word. Die souk begin nou besig word en dis net so 'n gewilde inkopie plek vir die swart rokke. Maar laat ek vertel dat dit ook by SAfrikaners wat hier bly of kuier gewild is want die winkeleienaars gooi maklik 'n "baie mooi" en "pragtig" tussen sy engels deur.Die pakkies begin ook nou meer word en mens troos jouself dat dit 'n bargain is en mens baie geskenkies vir huistoegaan gekoop het. Amelia sien 'n rok waarvan sy hou in die materiaal plek en besluit om ander dag as sy gespaar het van die materiaal te kom koop. Teen eenuur is ons verplig om die Blou souk totsiens te se want hulle maak toe vir 'n middagslapie. Corine was nog glad nie by enige mall in Dubai nie en ons besluit om vinnig by IBN Battuta te stop (ek het al heelwat oor hierdie mall geblog). Maar die dames is m-o-e-g en besluit om nie deur die mall te stap nie, maar die karretjie te ry. Hier wag hulle by die stasie in die China vleuel. Hulle lyk lekker moeg ne.By Egipte groep Amelia, sy het nou genoeg gehad. Nog 'n baie suksesvolle inkopietog ....

Nog 'n besoek aan Sharjah

Julle sal onthou dat ek 'n vorige keer van die Al Qasba en Eye of the Emirates in Sharjah vertel het. Nou net aan die ander kant van die Khaled Lagoon kry ons die Central Souq of ook beter bekend as die Blue Souq. Die van julle wat al in Dubai gekuier het, was verseker al daar, want mens kan/kon nogals daar lekker winskopies kry. Hierdie is die grootste van die markte (souqs) in Sharjah en in 'n baie tradisionele Islamiese boustyl gedurende 1979 gebou. Die buitekant het die pragtigste blou en wit teels in die aand ..... en in die dag

Hierdie mark bestaan uit twee vleuels met 'n oorhoofse tonnel wat hulle aan mekaar verbind. Die een vleuel is vir allerhande elektroniese ware en ander goed en die ander kant is meer goud en juwele.Daar is 600 winkels in die kompleks (ja nou het ek die shoppers se aandag). Waar die onderste vloer baie oopplan met winkels is, het die boonste vloer wat baie tradisionele goed, oudhede, matte, ens. verkoop 'n bazaar gevoel. Hierdie verligte bome is langs die lagoon in 'n parkie oppad na die moskee toe. Die meeste van die groot moskees in die UAE is pragtig verlig in die aand, so ook hierdie een by die souk. Die lagoon in die aand met die bote en liggies.

(Die aandfoto's is deur Eddie geneem tydens sy besoek daar verlede week.)

Ietsie in Sharjah om te gaan kyk

Ek self kom nie so baie in Sharjah nie, maar my eerste "solo" bestuur in die UAE was 'n baie stresvolle rit na die Blou scouk in Sharjah baie baie jare terug. Om dus al die ontwikkeling aan die oorkant van die blou scouk te sien, was vir my 'n nuutjie. Vir julle ouens wat lank laas daar 'n draai gemaak het, dit kan 'n lekker uitstappie wees vir die hele gesin.

'n Besoek aan Sharjah moet dus 'n rit in die "Eye of the Emirates" insluit sodat mens 'n mooi uitsig oor die lagoon, cornish, area en selfs ietsie van Dubai kan he.Die 360 grade "cabins" gee vir jou ' n uitsig wat mens nie gou sal vergeet nie. In die lugverkoelde cabins van die Eye of the Emirates hang jy 60 meter bo Sharjah om ver te kan sien. Die rit is pret vir aller ouderdomme. Hierdie "wiel" wat in die Nederlands ontwerp is, het 42 cabins en kan tot 336 passasiers vervoer. Hierdie is voorwaar een van die toeriste attraksies van die UAE en ek het nogals nie daarvan geweet nie. 'n Deel van die Al Qasba kompleks is 'n besigheidssentrum en die res bestaan uit verskeie ander plekke soos oa 'n verskeidenheid restaurante. Hier is 'n Lebanese, Fish Taverne, Portugese (Nando's nogals), Italiaans, Egiptiese en Indiese restaurante. Mooi uitsig om jou kos te geniet maar dit kan bietjie warm wees in die somer. Daar is ook 'n Kunsgalery waar gereeld allersoorte uitstallings gehou word. 'n 1500vk oppervlakte is vir die uitsluitlike doel gebou en bekende Arabiese kunstenaars se werke is al hier uitgestal. Beplande uitstallings vir die res van die jaar sluit kunstenaars van Frankryk en Italie in. Gedurende Mei maand is dit 'n Braziliaanse uitstalling. En dis nie al nie.... 'n ouditorium vir musiek en drama opvoerings en 'n rolprent teater is ook daar gelee. Van die beplaning vir die res van die jaar sluit in "Opera under the Stars" op 29 Mei
Ontspanning onder die "sterre" is wat hulle ingedagte gehad het met Al Qasba. 'n Plek waar almal kan kuier en ontspan langs die lagoon of selfs op een van die abras (watertaxi's), waar jy kan wegkom van die gejaag van die stad en verkeer en selfs "in die toekoms" kan sien met van hulle uitstallings. Die bootrit gee jou ook 'n mooi uitsig van die mense, stalletjies, brue en uitstallings.
Die dansende waterfontein op die maat van musiek is ook 'n moet vir almal om te sien. Hierdie vertoning is nie net in die aand nie, maar ook gedurende die dag en nie twee van die vertonings is dieselfde nie.

So as die Blou Souk op jou beplanning is en jy mense soontoe wil neem vir inkopies, sit baie ekstra tyd by en maak 'n draai by Al Qasba ook.