Wonder ….bus of boot

Altyd lekker om iets nuuts te doen en alhoewel ek al van hierdie bus gehoor het, was daar net nog nooit die geleentheid om dit self te ondervind nie. Maar verlede naweek wel, en kan ek julle sommer ook 'n ander deel van Dubai wys.

Ons kry die bus voor een van die malls wat ons nog nooit besoek het nie ... ja daar is sulkes :-).... en dan ry ons deur die ou deel van Dubai.

Na sowat 15 min in die strate, vat die bus ... of is dit nou ... boot die water.

Die busbestuurder of skeepskaptein vat ons al langs die Creek af deur die ou dele.

Dis maar 'n deinserige oggend, maar mens kan voel die somer hier is oppad. Maar mens kan sien die besige "Saterdag" verkeer op die water sien.

Watertaxi's of abras is volgelaai soos hulle die mense van die een na die anderkant van die Creek neem. Die oues kos maar dhs1 (R2) en is baie gewild in die nie-somer tye. Daar is klompe ander taxi's wat meer kos en a/c het, maar dit is teveel vir die werkers en die besoekers verkies ook om die weer en ondervinding op die oop abras te ervaar.

Daar is heelwat interessante geboue te sien en natuurlik hierdie moderne houtboot wat aan een van die hotelle behoort.

Orals is daar ook van hierdie restaurant-bote te sien. Dit kos so dhs300 (R600) per persoon as jy vir twee uur op die creek wil vaar terwyl jy eet.

Daar is twee van hierdie bus-bote en die ander een is so 'n kort koppie agter ons op die roete.

Een van die banke langs die creek gee ons kans om onsself in sy vensters te sien.

'n Ou souk waar daar baie winskopies te kry is. Hierdie een het klompe materiaal winkels.

Hier is 'n heritage village museum.

'n Klomp ou geboue, winkels en blyplekke by 'n watertaxi staanplek.

'n Restaurant.

Nog deel van die heritage village. En dan is ons watertoer verby, die boot verander in 'n bus en ons vat die pad terug deur nog 'n ou deel na die winkelsentrum.

'n Baie interessante en "anderste" ondervinding.

Woestyn Pret

Een van die dinge wat 'n groot aantrekkingskrag vir besoekers in die UAE het, is die woestyn .... Met ons koms 'n klompie jare terug was die woestyn baie nader aan die dorp as vroeer, en nou moet mens nogals 'n klompe km ry om dit te kry. Naweke is 'n gewilde tydperk vir mense om hulle 4x4's te neem en in die woestyn te gaan rondry. Toeriste maak gewoonlik gebruik van 'n georganiseerde toergroep om hulle woestyn in te neem. So vir William was so 'n uitstappie 'n hele nuwe ervaring.

'n Paar van die 4x4's jaag oor die duine. Die een is redelik hoog bo-op die duin.
Die groep wat op die toer gegaan het vat 'n breuk

'n Paar huise anderkant die duin

Het jy vir ons mooi foto's geneem Elise?
Hier dúrf hulle 'n groter duin aan. Ongelukkig het die foto's waar Manie, Elise en Arina groot oe maak (kan van bangheid wees) nie duidelik uitgekom nie.

Dan is dit tyd vir "sandboarding" en ek's seker William is in sy element
Hier gaan hy ....
Wonder het hy na hierdie toertjie "af geval of nie"

Die Kruis gesin saam met wie hy gegaan het

Arina gereed om dit ook te probeer
Daar gaan Elma ook ....
En natuurlik William weer

Die einde van die dag en Arina skud die sand uit haar skoene

William het darem sy skoene voor die deur gelos toe hy vanoggend huis toe gekom het.

Nuwe ontwikkeling

Ek het lanklaas vir julle iets nuuts van die UAE vertel en by hierdie tyd weet julle dat hier moet alles groter en beter as elders in die wêreld wees. Die laaste klompie jare het verkeer in Dubai iets ysliks geword en waar ons tien jaar terug nog gereeld Dubai toe gery het, is soontoe gaan slegs in uitsonderlike gevalle want mens kan vir baie lang tye in die verkeer vassit. Abu Dhabi is ook nie ver agter nie, en veral die laaste paar maande is die paaie soooooo besig. Dis of niemand by die werk is nie .... almal is op die pad. As mens so na die ontwikkeling in al die emirate kyk, kan mens verstaan dat as al daardie geboue mense in gaan kry, moet daardie mense vervoer word.

Gereeld word daar na oplossings gekyk en huidiglik is Dubai besig om te bou aan 'n metro treinnetwerk wat daagliks 1.8 miljoen mense gaan vervoer. Wanneer hierdie netwerk voltooi is sal die rooi en groen lyne (spore) 'n totaal van 74,6 km lank wees en die wêreld se grootste netwerk wees wat ten volle outomaties en sonder drywers loop. Hierdie trein sal 3 klasse hê, die goue klas met luukse sitplekke en versierings, die vroue en kinders klas wat spasie sal hê en plek vir stootwaentjies en pakkies en die silwer klas (ekonomies) wat verskillende tipe sitplekke gaan hê - die vir mense wat wil uitkyk by die venster of mense wat met hulle vriende wil kuier tydens die rit.

Die hoofdoel van die netwerk is om alternatiewe manier van vervoer te verskaf en sodoende padverkeer ligter te maak en ook om mense vinnig en veilig na en van die binneste deel van die stad te vervoer. Altesaam 7000 werkers is op verskillende plekke in die stad besig om aan die netwerk te bou. 'n Gedeeltelike opening word beplan vir September 2009 en hulle hoop vir 'n ten volle klaar projek teen die jaar 2012. Daar sal altesaam 47 stasie deur die stad wees. Twee hooflyne word beplan.

Die rooi lyn sal 29 stasies hê waarvan 24 in die lug is, 4 ondergrond en 1 op grondvlak is en sal 52.1 km lank wees met 4.7 km daarvan ondergrond. DIe groen lyn sal 18 stasies hê, 12 in die lug en 6 ondergrond en sal 22.5 km lank wees met 7.9 km daarvan ondergrond. Hier kan julle sien hoe die spoorlyn in die lug gebou word langs die besige snelweg.

By al hierdie stasies sal daar natuurlik parkeerplekke gebou word en busse om mense na hulle bestemming te vervoer. Op hierdie stadium van die beplanning is hulle alreeds besig om nuwe uitbreidings te beplan en die netwerk is nog nie eers in gebruik nie!

Ek is seker dat dit van die vervoer probleme sal oplos vir 'n tydjie en vir ons ouens wat sommer net tot by die Battuta Mall en nie verder gaan nie weens verkeer, sal nou binne die dorp ook ingaan. Sal lekker wees as daar 'n spoorlyn tussen Abu Dhabi en Dubai is, maar dit sal seker nog kom, na my tyd. Om die waarheid te sê ek weet nie of ek die voltooiing van hierdie projek in 2012 sal sien nie. Net om te wys hoe vinnig die stad uitbrei kan ek ook noem dat 'n pers en bloulyn ook reeds in die beplanningsfase is. En wat dit alles kos? In 2005 toe die tender toegeken is, was die bedrag 15.5 biljoen dirhams - dit het dalkies 'n bietjie verander teen hierdie tyd.

Canal Walk Mall

'n Nuwe mall is altyd 'n moet, al is dit net om dit bietjie te gaan uitkyk en sien of mens dit regtig weer wil besoek. Een so 'n een is die nuwe Canal Walk Mall in Dubai. Dit is deel van die Festival City ontwikkeling.

Soos ek 'n vorige keer al gesê het daar moet 'n "trekpleister" wees en hier is dit oa die 450 meter lange kanaal waar mens met 'n watertaxi na verskillende winkels en/of restaurante kan vaar.

Die ontwikkelaars sê dat daar 40 restaurante langs die kanaal sal wees. Omdat dit nog 'n bietjie hittig in die land is en die bouery nie orals klaar is nie, vaar die bootjies op die oomblik slegs in die namiddag, so ons kon dit nie gaan uittoets nie.

Ons het darem 'n lekker Frappacino by Costa's gedrink in die koel binnehof. Hierdie ou wat seepballe blaas het die mense vermaak.
Wanneer al die ontwikkeling rondom die mall klaar is, sal daar oor die 500 winkels wees met 25 groot anker winkels waar mens alles en nog wat sal kan koop

Die mall is nog nie so besig nie, maar wanneer alle winkels oop is EN die padaanwysings goed is, sal daar mense begin stroom soontoe. Ons het maar lekker rondgery en selfs Sharjah besoek op soek na die aanwysingsborde.

Hier is een van die 90 restaurante wat uiteindelik in die mall gaan wees. Hierdie een is onder die roltrap wat van IKEA af kom gelee.

Ek is seker ons sal die Canal Walk mall weer besoek al is dit net om op die bootjies te vaar. Maar met al sy verskillende watervalletjies orals in die mall, is daar op die oomblik ook 'n rustige gevoel en nie 'n buzz nie. Dit kan egter verander as mense die plek sonder 'n padkaart kan kry.

Wild wadi

Net voordat julle dink dis net ek wat in die dorp rondry. William, Arina en Elma het bietjie die Wild Wadi in Dubai besoek. Meeste van hierdie foto's is met sy foonkamera en 'n waterkamera geneem, so die kwaliteit is nie so goed nie.

Die waterpark is 12 hektar groot met 30 "waterrides". Dis tussen die Burj Al Arab en Jumeirah Beach Hotel gelee en so 20 min vanaf Dubai middestad en 90 min vanaf Abu Dhabi. Dis die Jumeirah Beach Hotel wat op die regterkant uitsteek.

Almal kry sulke waterdigte armbandjies met jou geld daarop geprogrameer. So kan jy jou drink en eetgoed betaal sonder om kontant byderhand te hê. Maar mense dis baie duur. Water bv kos Dh 9 (R18) en 'n Roomys Dh10 (R20)!!!! Nadat jy die toegang van Dhs170 (R320) betaal dink ek nie mens is meer lus vir water nie. Jy kry egter die geld wat jy nie gebruik nie, terug as jy klaar is. Hier wys Arina haar armband by die ingang. Die streeptruie het so na Nuweland gelyk. (Ek weet sy is 'n Blou Bul ondersteuner - arme kind)

Dis die "Fossil Rock" wat elke uur om die uur met 60,000 liter water opgevul word om 'n groot waterval te vorm. Dit gaan gepaard met klank en ligte en 'n baie gewilde besienswaardigheid by die park.

Hierdie is die Jumeirah Sceirah, die hoogste, vinnigste vry-val glybaan buite Noord-Amerika wat jou met 'n spoed van 80 km per uur laat afkom. Dit is 33 meter lank!! Ongelukkig geen foto's op die glybaan nie, kameras en fone was om verstaanbare redes nie toegelaat nie.Die Summit Surge en Rushdown Ravine is 'n kombinasie van glybane en ietwat anders. Die water skiet jou op hierdie bane boontoe na 'n swembad area en dan af met 'n 170 meter, styf-vashou rit.

Hier begin William se rit boontoe. Hy loer nog agtertoe en ek weet nie hou hy al styf vas nie.Hier vat hy dit rustiger op die Juha's Journey. Dit is 'n 360 meter lange lazy river waar mense van alle ouderdomme net rustig met die rivier kan vaar. Lyk na my tipe rit.
Die meisies BRAAI in die hitte en daai duur waterbottel lyk vir my baie leeg. Arina kan jy dink jy het 'n week gelede so warm gekry en nou sit jy in Ierland en koud kry?
Die drie van hulle afgeneem voor die familie/kinder aktiwiteitspark - die Juha's Dhow en Lagoon. Daar is 100 waterspeletjies wat 5 glybane, watergewere ens vir die kleintjies het. Alles is baie kleurvol en die kinders kan ure van lekker pret daar hê. Die drie het nie daar gaan speel nie.
Ek kan nie verskriklik goed onthou waar hulle die foto geneem het nie, maar dit lyk vir my baie nat en Arina steek amper net-net bo-kant die donut uit.
William by dieselfde plek net sonder die donut - miskien het hy dit geeet.
Aaaai ek het dit, dis by die Flood River (wat dit ookal beteken) geneem. Hier is William en Arina lekker nat.
Dit begin nou lekker donker raak (so 8 nm). Hierdie is Breakers Bay en hier kan mens "surf" as jy sou wil. 100,000 liters water word hier gebruik om branders van tot 2 meter hoog te maak.Selfde plek net later in die aand. Op die agtergrond die Jumerah Beach Hotel.