Tyd vir bietjie avontuur

Nelmari moet al die goed waarop sy uitmis in die jaar inhaal en een van hulle is 'n besoek aan William en die Wadi-adventures.  

Terwyl daar gewag word om met alles te begin, kyk ons hoe een van ons jong volwassenes die branders aandurf en homself baie goed van sy taak kwyt.  

Dan is dit tyd vir die rafting en daar word eers mooi geoefen met die gids om sy opdragte uit te voer.  

Hulle doen goed met die "mak" rivier ....   

Dan is dit tyd om die meer woeliger en sterker rivier aan te durf.   

Mens moet bietjie meer konsentreer op die roei en die boot word in alle rigtings, links, regs, bo en onder geskud terwyl daar om lewe en dood geroei word.  

Hulle was so oulik, kyk net daai konsentrasie.  

Maar die gids dop die boot om en hulle gaan rivieraf.  Eers met 'n glimlag, maar hoe meer hulle in die maalkolk vasgevang raak hoe meer benoud en daar kom selfs 'n paar klein "help" uit.  

Tyd vir rus is daar nie, want nou is dit tyd vir rafting-kayak - wat heeltemal anders is as waaraan hulle gewoond is.  Daar word geoefen om op te kom as die kayak omdop en die meisies dink hul uitrustings is baie oulik.   

Dis tyd om die rafting water aan te durf.  

Maar gou-gou hou die meisies "vergadering" en besluit hulle wil nie op die sterk rivier gaan nie, dit lyk te gevaarlik.  

En steeds is daar geen rus nie, want die airpark is aan die beurt.  Die meisies op die Groot Swaai waar Will hulle help.  

Gereed vir die 20m hoe uitdaging.  

Daar word geklim en geklouter en vasgehou en geswaai en almal het lekker pret.  

Maar alles moet op 'n einde kom, en die dag word afgesluit met die ziplyn.

Almal lekker moeg, maar het 'n lekker dag gehad, selfs die een agter ie kamera.

Die Oase dorp

Met die land wat so 'n daggie of twee vakansie gehad het oor die Nuwe Jaar en die heerlike koeler weer wou ons 'n slaggie weer gaan kuier in Al Ain, die tuindorp van die UAE. Ek gaan nie weer 'n hele klomp foto's wys en vertel van die dorp nie, net nuwe updates :-).

'n Besoek aan die dieretuin was eerste op die lysie want mens kan actually nou in die dag in die son loop. Nie baie plekke wat mens kry wat lyk asof die moskee binne die dieretuin is nie.

Ons kon lekker rondloop en kyk en party het selfs 'n baadjie gedra so koel was dit.

Berge is daar nie baie in die land nie, dus neem mens hulle af as jy voor, langs of bo-op hulle is.

Van die dieretuin na nr 2 op die lysie, die berg Jebel Hafet. Hier is daar baie verandering vandat ons laas daar was. Daar is nou 'n pad wat mens kan oploop boontoe en die meisies het dit gedoen en daar is selfs tafeltjies en stoeltjies sou jy wou stilsit in die son. Maar soos orals in die wereld het 'n paar dwase ook hulle name op die berg begin skryf.

Die sheik se paleis sit nog hoog waar die arende vlieg met 'n hele nuwe uitkyktoring aanbouing op die foto onder regs.

Ek verkyk my nog elke keer aan hoe groen hulle besig is om die berg en omgewing te maak met hulle aanplantings

.

Orals is daar ook nou inligting oor die berg en wat hulle alles al daar ontdek en uitgegrawe het, dus het die "ons het die berg al gesien" nou baie nuwe stories vir ons gehad.

En soos mens aan die onderkant van die berg kom is die sproeiers vol oop besig om die berg se nuwe gras nat te spuit.

Altyd lekker om in Al Ain te gaan draai, dit voel nog baie platteland.

Almal wat terug is by die werk, sterkte!!

Ons is weer kinders

Ons soek 'n kampterrein vir 'n jeugkamp en Al Ain is 'n opsie. Dit beteken ons moet uitry en gaan kyk en dan kry ons ook sommer kans om met die Sandmense daar te kuier. Vicky is egter baie gaaf en gaan doen al die inwin van inligting vir ons, wat beteken ons kan bietjie by Al Ain se dieretuin gaan inloer. Miskien as ons geweet het dit gaan 'n volbloed somerdag in die woestyn was, sou ons dit nie gedoen het nie, nietemin, dit was bloedig maar lekkerrr! Met die aankoms lyk dit maar woestynerig, met beelde van diere as 'n aanduiding daar is 'n dieretuin en op die kaart lyk dit nogal groot maar kyk na die foto waar Nelmari saam met die flaminke is, is dit 'n woestyn?! Hierdie dieretuin is in 1969 amptelik geopen en huisves veral boksoorte en diere van die steek. Ons het lank gestaan en kyk na 'n baba bokkie wat nie geweet het waar sy/haar mamma is nie. Die oryx het besluit om dit sommer te neem en wou haar glad nie afstaan toe die mamma terugkom nie. Dis seker ook een van die min dieretuine waar jy 'n moskee op die agtergrond sal kry. Nelmari lyk baie in haar skik met die uitstappie, kyk net daai gesig. Ek het noual genoem dat dit vreeslik warm was en die diere was maar lui en het op allerhande maniere probeer koel bly. Die meerkatte was egter die mees aktiewe dier in die dieretuin en het vir baie vermaak gesorg. Die een wat ons simpatie gekry het was die gorilla. Nadat sy maatjie onlangs oorlede is, het hy net gesit en wou glad nie eers vir ons deur die venster loer nie. Nelmari en Charmaine het die ou altwee probeer beraad, maar hy wou niks hoor nie. Tussen die hokke is daar darem sulke skadu tente wat lekker is, met sproeiers wat elke nou en dan aangaan en die mense spuit soos hulle verbykom (dis nou soos daai spoeiers wat hulle tydens die maratons ook gebruik). Die voels bo die hok laat my dink aan mense, wat altyd wil wees waar ons dink die gras is groener. Hulle is vry maar drom saam om binne die hok by die ander te wees wat heelwaarskynlik liewers buite wil wees. Lekker London dairy roomys terwyl ons wag in die skadu vir die treintjie. 'n Boom hier gee nie koelte nie, maar wel 'n bietjie minder son op mens se kop. 'n Plek waarnatoe ek nie wou gaan nie was die slanghokke, maar daar is A/C in, so vinnig afkoel voordat ons klaar maak. Aanwysings oor wat ons mag saamneem binnetoe ... kan julle lees wat daar staan? Warm maar lekker gekuier saam met die diere. Nou vir 'n teetjie saam met die Sloans en daarvan vertel ek later.

Klompe lekker ...

Saterdag het ons bietjie uitgery Al Ain toe en kans gehad om klomp lekker dinge te doen. Lekker te kuier saam met vriende, lekker te eet, aan kindergroep goed te werk en natuurlik sport te kyk (die uitslag was nie heeltemal so lekker nie)! Ons het so bietjie ons boeke en musiek aan die groep in Al Ain gaan bekendstel. Hoekom sal Greg so lyk wonder ek? Die Sloans het ons uitgeneem vir ete by Chili's en ek's baie trots op myself dat ek die kamera nie eenkeer in die restaurant uitgehaal het nie. (Ek kan byvoeg die ander kon dit nie glo nie en wou sommer vir my foto's neem). Na ete het van die ander groeplede by ons aangesluit en ons het lekker beplan. Natuurlik wys ons graag die mense ons musiek en na die afsluiting sluit ons af met Glory and Honor. Loer bietjie hier om ons te hoor sing! Hierdie verbasing op die gesiggie was vir my te oulik. Chrispin kom om die hoek en hoor/sien die volwassenes aan die sing. Dan is Vicky nog 'n bobaas bakster en ons kuier lekker met kaaskoek en souttertjies. Greg hou nie sy bord vir nog nie, hy wil eintlik net vir "Buddy" (die hond) 'n stukkie he :-). Die kinders het in die hitte sommer buite in die swembadjie geplas. Dan is dit rugby en omdat Abu Dhabi 'n verpad terug is van Al Ain gaan ons deur die martelproses van kyk daar. As ek geweet het ons gaan "so goed speel", het ons waarskynlik dadelik teruggery huistoe. Nie almal het rugby gekyk nie en daar is selfs hard tydens die rugby aan die kinderprogram gewerk. Hoe opgewonde lyk Greg nie!?!

Dankie Vicky, Greg en kinders, dit was 'n heerlike dag saam met julle!!

'n Vinnige draai in Al Ain

'n Vinnige besoekie aan Al Ain net sodat Leane die dorp kan sien. Al Ain in Arabies العين, beteken "The Spring" en dit is die vierde grootste dorp in die UAE. Dit grens aan Oman en is omtrent 150 km vanaf Abu Dhabi. Alhoewel hulle van Al Ain praat as die garden city is dit die dorp waar die vorige en eerste president van die land gebore is en is dit meer bekend vir sy kulturele geskiedenis van die land. Daar was net tyd om twee van die besienswaardighede te gaan besoek.Een van hulle is die Jebel Hafeet berg wat 1340 m hoog is. Die pad kronkel vir so 11.7 km boontoe met 'n 3 laan teerpad. Hulle se daar is 21 draaie tot bo. Die pad lei na drie goed toe ... Eerste regbo die uitsig waar mens na Saudi en Oman se kant kan uitkyk en ook die plase aan die onderkant kan sien. Tweedens en ek neem aan vir hulle die belangrikste, lei die pad na een van die paleise toe wat reg bo-op die berg gebou is. Kan julle indink hoe moeilik dit moes gewees het? En die derde en nuutste toevoeging is die hotel in die middel. 'n Heerlike "oase" vir 'n warm dag. Die berg lyk nie soos berge wat ons ken nie, dis verskriklik "klipperig" en vaal. James probeer 'n poging aanwend om te klim, maar dis nie sy sterkpunt nie.Aan die voet van die berg is die "Green Mubazarrah" wat spesiaal vir toeriste ontwikkel is. Mense julle moet mooi kyk. Die groen berg is gras wat op die berg geplant is en word elke dag besproei!! Dis hier waar mens een van die ondergrondse waterbronne van Al Ain kry. Leane voel die water wat uit die grond uitkom. Die waterbronne vloei alles in 'n mensgemaakte "lake" met baie vissies. 'n Ander moet om te sien is een van die oorspronklike Oases. Al Ain het 7 van hulle wat eintlik vertel dat die dorpie regtig as 'n rusplek in die woestyn gedien het. Mens kan baie lekker deur hulle stap en ry. As jy in die motor bly kan jy jou amper verbeel dis heerlik koel. Leane staan in een van die watervore. Die dadelbome dra almal swaar op die oomblik aan die dadels. In die dorp word hulle vasgebind, maar hier kan mens sien dis ou bome en hulle het trosse! Neem kennis nie sommer enige iemand kan die oase binnegaan nie ... net eienaars en toeriste. Wie presies sluit dit uit? Die mense wat Al Ain ken sal se hoekom net twee plekkies besoek daar is mos baie ander goed om te sien?! Kyk na die temperatuur in die motor ... mens wil so gou moontlik by die huis kom, die 50's is met en op ons!