‘n Koue Skouspel soos min

My eerste ysskaats-vertoning was baie baie jare terug by die Goodwood Ysskaatsbaan, toe internasionale groepe gereeld ‘n “show” soontoe gebring het. Ek kon my verkyk daaraan. Nooit gedink dat ek in die woestyn, midde in ‘n lekker sandstorm weer langs ‘n ysskaatsbaan sal sit om na ‘n internationale vertoning te kyk nie.

So twee aandjies terug was ons gelukkig genoeg om die wereldberoemde Steve Wheeler se groep hier in aksie te sien. Mag slim klink, maar ek het nie eintlik van die man geweet nie. Hy staan bekend as die wereld se beste ysskaats “illusionis”. Hierdie ou het ‘n lys so lank soos my arm van TV-shows en ander vertonings wat hy al vir baie jare aanbied op die "planke/ys" bring.

Dit was ‘n vertoning van ligte, kleur, uitstekende skaatswerk, ongelooflike kostuums en besondere kultoertjies.

Die skaatsers is ook nie sommer hierjy mense nie en die paar was ‘n paar jaar gelede die Amerikaanse Skaatskampioene – mens kan dit sommer sien.

Om foto’s te neem was uiters moeilik met die wit van die baan, die silwer van die dak en al die ligte en rook wat gedurig verander, maar ek dink darem julle kan ‘n prentjie kry van die vertoning.

Hierdie vrou het met een hoepel begin en later ‘n hele klomp gehad. Hoe sy kon skaats en hulle in die rondte draai gaan my verstand te bowe – maar dit was mooi.

Daar was gereeld tussen-in sulke toertjies en hierdie een was ‘n skaatser op ‘n mespunt.

Net so ‘n paar daggies terug het ons die dvd "Cutting Edge" gekyk en hierdie toertjie het ons van voor af na ons asems laat snak – veral sekere van ons.

Nog toertjies het gevolg en die laaste een was van ‘n ou wat in ‘n boks met skerp lemme toegesluit word en dan word hy gespin en die volgende oomblik staan hy bo-op die pawiljoen regs langs ons en net voor die royals wat hulle yskoud geskrik het. Dit was regtig ‘n hoogtepunt afsluiting.

Mens vertel moeilik hoe dit lyk en voel, maar as jy in Abu Dhabi of omgewing bly (ja julle ouens daar in Al Ain en Dubai ook), gaan kyk gerus. Vicky die kinders sal dit verskriklik geniet. Die vertoning is elke aand om 8 uur by die ysskaatsbaan tot 15 Augustus.

Nog min dae of nie?

Julle sal onthou dat ek 6 Junie my blog afgesluit het met 85 vakansiedae nog oor .... Wel vandag is daar amptelik nog 25 skoolvakansiedae oor en dit raak al hoe moeiliker om Nelmari "besig" te hou. Toegegee met die seuns en Leane wat hier gekuier het, het dit baie gehelp, maar nou is die malls deurgeloop en die geld is opgekoop en al wat oorbly is legkaarte en die laaste van die prentjies wat klaar geverf moet word. En dan sit ons nog met die vreeslike hitte waarvoor mens net nie kans sien om uit te gaan nie. Nelmari het die probleem oorkom en sit met warm klere, sokkies en 'n kombers haar legkaart en bou nadat die A/C op baie koud gestel is. Na 85 dae is 25 nie so min nie, ons is amper daar .... hoop ek maar nou het die plaaslike mense my bloed ook dieselfde temperatuur as die hitte. Omdat Ramadan hierdie maand begin, voel hulle die kinders kan nie nou in die hitte en met Ramadan skool toe gaan nie, die kinders gaan moeg (na 3 maande vakansie) en warm wees, en die vakansie moet met nog 'n maand verleng word !!!! ..... ja 'n hele 30 dae!!! Is dit nie iets om 'n aanval oor te kry nie? Hoe haal skoolkinders 'n hele maand se werk in want soos ek die Arabiere ken sal hulle dit nie wil inwerk nie. In elk geval is Ramadan 'n klug want almal bly net wakker om meer te kan eet. Gelukkig lyk dit asof die onderwysdepartement en die privaatskole nie daaraan wil byt nie ......

Soet .... sonde

Na die ete by Rodeo Grill het ons meisies in Abu Dhabi mall gaan loop op soek na 'n spesifieke kleur bloesie by 'n romp. Ongelukkig omdat dit Vrydag is, was meeste van die winkels nog toe. So besluit ons om gou 'n koffie te gaan drink en miskien maak die winkel wat ons by wil wees oop.

Een van die lekkerste koffiewinkels met die mooiste uitsig oor die swemarea van die Beach Rotana Hotel.

Seattle Koffiewinkel .... ek weet daar is/was een in Menlyn ook.
Hier is die swembaddens met 'n deel van die see deur die venster afgeneem.
Die boot met die piesang agter hom. Julle sal ook 'n stukkie van die eiland sien wat nou ontwikkel word met groot woonstelle, winkels, ens.

Hierdie houtdek is in die middel van die swemarea in die see.

Die hotel se klein hawetjie waar hulle allerhande soorte watersporte beoefen.

Na die groot ete het ons nie eintlik plek vir nog nie, maar ons bestel wel een versoeking cinnamon bun saam met die Chai tee.

So soet mens se ore beweeg. Hier word hy mooi in die helfde gedeel. Nelmari het nie belang gestel nie.

Al is ons hoe versadig word die soet nog uitgelek ook. Mens kan partymense ook nie altyd orals neem nie. As sy nie sjokolade mors nie, lek sy die borde uit. Ek sal liewers nie name noem nie. So het ons toe nie die bloesie gekry nie, maar erg ongemaklik gevoel van al die eet.

Nuwe uitbreiding

William en Arina het verlede naweek by 'n nuwe uitbreiding in Abu Dhabi, Mangrove Village gaan swem. Kyk bietjie hoe lyk die ontspanningsgeriewe - hulle het ongelukkig geen foto's van die villas geneem nie.
Hier is die ou langs die swembad afgeneem. Agter hom is deel van die "recreation centre".Hierdie kompleks is teenaand die see gebou en bestaan uit 4 en 5 slaapkamer villas met elkeen hulle eie private swembad, ontwerpers tuine en toegang tot hul private strand. (Dis nou volgens die ontwikkelaars) Hierdie is die gemeenskap swembad
Die kompleks lê ook groot klem op sport en ontspanning en is daar 'n groot sentrum gebou waar daar onder andere 'n groot gym, kinderdagsorg sentrum en restaurant in gelee is.
Tennis- en basketbalbane is ook opgerig vir die inwoners
By die kinder speelarea is daar ook 'n groot swembad vir hulleDie binnehuise swembad by die gym. Daar is ook 'n ten volle toegeruste Marina vir alle watersporte en bote vir die gebruik van die inwoners.