Die weer begin nou mooi saamspeel en terwyl ek skryf op hierdie Vrydag Sondagoggend is dit 'n koue 22 grade wintersoggend. En winter beteken mens kan half bietjie buite begin leef. So het ons dan ook verlede week die SA kerkjeug vir 'n uitstappie na die waterpark geneem en dit was vet pret.
Op die bus was dit omtrent 'nvrolikheid en Charmaine en Corinne was meer as gewillig om vir my 'n "pose" te gee. Terwyl ons vir die kinders van die ander emirate by die hek gewag het, het ons Abu Dhabi se kinders solank ingestuur om plek te kry. Ek was nie verras om 'n paar minute later net 'n hoop handdoeke en sakke te sien sonder kinders nie. Hulle was daarop uit om my en veral die kamera vir die dag te vermy. Gelukkig het ek hulle gevang waar almal op die lazy river hop vir 'n rit deur die park.
Dankie tog vir die "Sandlanders" van Al Ain wat nie meer so klein is nie en heeltemal gewillig vir foto's was. Celandre en Celine word groter elke keer as ek hulle sien en hulle het omtrent die waterritte geniet.
Natuurlik moes Corinne ook deurloop onder die kamera en veral hierdie rit waar sy en Hermien met 'n stinkspoed afgekom het was 'n uitstekende geleentheid. Kyk bietjie hier na nog foto's van die kinders en park.
Nelmari wat glad nie afgeneem wou word nie, het lekker saam met die ander snr tieners gekuier en die mamaratzi soveel moontlik probeer vermy - nie dat dit enigsins moontlik is nie :-)! En soos gewoonlik het die park se katjies vinnig gesien waar hulle bietjie aandag en liefde kan kry.
Die dorp het groot planne vir die week .... hou hierdie spasie dop!
Lekker naweek!!
Altesaam was ons 7+ uur op die pad (soontoe en terug) en het in 'n hele paar verkeersopeenhopings beland, maar ons kinders was wonderlik op die bus. Nelmari en Minri het gedink as hulle agter in die bus verspot is, ek hulle nie sal kan afneem nie. 
Was so lekker om al die mense van Sharjah, Dubai en Al Ain ook te sien en die kinders kan nie wag om die park in te vaar nie. Dit is die grootste waterpark in die UAE - selfs groter as die Wild Wadi waaroor almal so gaande is. 
Eerste vir die fotograaf durf hulle die Family Ride aan. Hier staan Nelmari en van haar maats bo en wag hulle beurt af. 
Kyk net hoe kom hulle om daai draai en die gelag en geraas daarmee saam was iets ysliks. 
Amper die einde en hulle probeer vir oulaas nog bietjie spoed kry. 
Hulle maak lekker golwe op die einde. 
Nou word hulle nadergehark om uit te klim en die volgende rit word alweer beplan. Nelmari het 'n waterkamera saam op die ritte geneem en hoeveel gaan uitkom weet ons nie, maar dit behoort nogal interessant te wees. 
Dit is regtig water net waar jy kyk. Hierdie was onder die family ride. Kan mens amper nie indink jy staan in die woestyn nie. 
'n Lekker speelplek vir die kleintjies ook. Crispin lyk maar traag aan die begin om daar te gaan speel. 
Groot sports as die vyf wat sal mens dit nou noem, resies gly? Op hierdie stadium is Minri voor. 
Hier is nog 'n rit waar alles so deurmekaar gekoek is en jy weet nie regtig by watter pyp jy gaan uitkom nie. (Dis veral moeilik vir die kameraman). 
Ek kan darem Nelmari se landing vang. 
Weet nie wat die handsein beteken nie, maar die laaste ou kom ook aan. 
Net om julle weer te herinner ons is eintlik in die woestyn. Hierdie ouens het 'n ding oor water want in die dorpe is fonteine 'n groot ding. 
As daar 'n volleybalnet is, al is dit ook in die water, sal jy Nelmari daar kry. Sy en Minri is braaf genoeg om die seuns aan te durf. Hier is lekker gespeel. 
Nog 'n speelplek vir die kleintjies, 'n volkaan waar water uitspuit. Aan die binnekant is 'n groot grot met lekker vlak warm water so die outjies uit die son wil bly of sommer vir die mammas om met die babas te sit. 
Baie jare terug, is hierdie foto'tjie van Nelmari op een van die seekoeie buite die volkaan geneem. 
'n Klompie jare later is die seekoei baie kleiner. 
Daar was ook 'n "wave pool" en hier wag die klomp vir die branders om te kom. 
Die water is baie meer onstuimig as wat die see hier word en dis groot pret. 
Die dragon rit wat net so 'n gekoekte spul pype is. 
Die black hole waaroor die kleintjies mal was, maar die grotes niks van gehou het nie. Jy kom in daai swart pyp af vir 'n lang afstand sonder om lig te sien. Nelmari vertel my daar is net sulke klein liggies en een van die dogtertjies vertel my, die tonnel is vol sterretjies. Duidelik het Nelmari nie nog sterretjies gesien nie. 
Een van die baie restaurante op die perseel. Hierdie is eintilk 'n "water-bar" maar geen alkohol word bedien nie. Hier is natuurlik nog klomp goed soos die "soutsee-swembad", water stampkarretjies, mini-dieretuin met die oulikste 2 weke oue baba apie en 'n mini-mall! 
Ja, en waar daar 'n mall is, daar moet Charmaine ook 'n draai gaan maak al is dit 'n mini ene :-). 
En glo dit of nie, sy kry selfs iets in die mall te koop --- en 'n lekker roomys! 
Vir oulaas net voor ons terugry is dit die lazy-river wat reg om die waterpark vloei waar mens lekker kan rus. Ons het gehoop op 'n moee rustige bus, maar die kinders was uit hulle kassie wat ook 'n goeie teken was - Almal het die dag geniet!