Nelmari is siek

Woensdag was Nelmari bietjie olik en nadat ek haar vroeg by die skool gaan haal het, het sy ook die volgende dag by die huis gebly. Daar is aan Charmaine se AC's gewerk en ons moes "dagma" vir die hondjies speel. Het Nelmari dit nou geniet? (En ek ook)

Hierdie hondjies het gou-gou gewys dat sy op hulle volle ondersteuning kan staatmaak vir die "siek" wees. Gou-gou het hulle self soos "pasiente" gelyk. Hierdie foto net omdat dit so oulik was - Didi sleep met sy kameelperd.

Nelmari sou elke dag so by die huis wou bly. Ons het jou seuntjies geniet maat!

Vlooimark met boerewors rolletjies

Vlooimarkte hier in die dorp is maar skaars en glad nie op die vlak van Hatfield of Groenpunt nie en toe iemand besluit om een by die nuwe woonbuurt Mangrove te begin moes ons natuurlik gaan kyk wat en hoe. Vir die wat sal stry oor die skaars vlooimarkte ... ek praat nie nou van souks nie, ek praat van 'n regte straatmark soos ons by die huis het. Dis warm en die eerste ding wat ons sien/ruik is die boerewors wat gebraai word, lekker man en dit hier in die woestyn! Brian en Trevor het van die slaghuis se wors kom braai en rolletjies en biltong verkoop. Ek hoef nie te se dat daar heeltyd 'n aanvraag was nie. En toe ons eers binne is, hoor mens net Afrikaans en ken amper almal wat daar ronddrentel. Die eerste paar minute loop ons Claudia, Jessica, Winnie, Annemi, Sheryn en Annelize en selfs Mynhardt raak. Gou-gou het Nelmari en Jessica elk een van Charmaine se brakke op die arm en dis ook maar goed want nou wil/kan sy wat Nelmari is, nie so baie koop nie. Daar is nie so baie stalletjies nie en miskien was die hitte ook te veel vir die mense, maar dis 'n begin en dit kan uitbrei na iets lekkers en groots! Miskien kan Nelmari en Jessica ook 'n stalletjie oopmaak wat se Dh5 en vryf 'n chichauhau :-). Die kinders het glad nie omgegee dat hulle mammas shop nie, hulle wou net aan die hondjies vat. Ek moet se dat ek in die hitte die eerste tekens gesien het dat hulle wel hondjies is, hulle tongetjies het verskriklik uitgehang van die hitte en katjies en muise s'n doen dit nie. Behalwe baie mooi kaartjies het ons niks gekoop nie, maar dit was iets anders en lekker om te doen.

'n Vriendin en haar nuwe troeteldiere

Vir maande nou al word daar in spanning gewag vir die nuwe hondjies om van SA af te kom, en eindelik hierdie week was dit sulke tyd. Ek moet by se dat Nelmari self nie meer kon wag nie, mens sou sweer dis haar honde. Taffy en Didi kom veilig na die vlug hier aan en gou-gou wil hulle ma seker maak dat hulle ingeburger en tuis voel. Vir die van julle wat gedink het Charmaine is erg in Marina Mall ..... julle het haar nog nie in 'n troeteldierwinkel gesien nie. (Elriza dis sodat jy kan sien jou ma gaan mooi na die kleintjies kyk en baie bederf.)Wat is dit die keer ..... genugtig die ounooi het altyd 'n verrassing wat sy inbring. Ek sal maar net weer depressief moet raak en 'n allergiese reaksie vir die honde wys, miskien help dit dat ek nog steeds die meeste aandag kry dink Dee. En dan is dit tyd vir die hondewinkel. Lekker sjampoo/badgoed. Gelukkig besef sy gou dat dit seuntjies is en miskien nie heeltemal na lavender wil ruik nie. 'n Pak hondedoeke is ook nodig. Sal een pak genoeg wees?Watter van hierdie bedjies sal die beste wees? Dis 'n moeilike besluit. Op die einde kies sy heeltemal 'n ander een. Heleen herken 'n goeie klient as sy een sien en help bietjie met die harnas en leibandjies soek. Ek moet nog speelgoed en kosbakke kry .... oooo en tande ringe waarin mens grondboontjiebotter smeer vir hulle tandjies. My hande is vol, is hier nie waentjies nie?Kom honnes kom kyk wat het julle ounooi vir julle gekoop. Dis lekker baie speelpgoed, maar hoekom is dit in hierdie mandjie gepak dink Didi? Kom Taffy dat ek vir jou die nuwe harnassie kan aansit. Die hond is bietjie skepties. Lyk ons nie spoggerig nie? Weet nie of sy regtig dink ons gaan hiermee stap nie, maar ons hou dit vir 'n verrassing.Dankie ounooi ons hou van al die goetertjies wat jy vir ons gekoop het. More vra ons nog.... Kyk julle oulike mandjie, sien so moet julle in hom le kry hulle 'n kursus in mandjie slaap.Die nuwe mandjie is baie oulik ounooi, maar ons verkies die skoot dankie. Duidelik nog bietjie vlugvoos ook.Hulle word vir hulle eerste "walkies" in Abu Dhabi geneem en ek sien sommer hier kom moeilikheid. Een van die brakkies is vreeslik "opgepiep" en wil net gedra word en natuurlik gee sy gehoor aan die versoek. Hier gaan hulle hul bene verloor dis verseker. Hulle sit agter in die motor by Nelmari wat heeltemal chuff is met die reeling. (Die arme straatkat weet nie dat haar mamma meer van die hondjies hou nie)