Die pypskoonmakers dief ….

Ek het julle mos al vertel van ons gemmer straat kat/kangeroe en hoeveel ure se pret hierdie opregte gemmer ons gee. Sy het baie geite en goetertjies van mal wees oor water, al haar spesiale en kosbare goedjies bere in haar kosbakkie ens. ens. As sy slaap slaap sy die slaap van 'n dooie en mens kry haar nie wakker nie, maar dan as sy opstaan is dit speeltyd of jy wil of nie. Sy kies haar speelding en bring dit dat ons kan fetch speel.

Sy haat dit om te spring na goed toe en al die speelgoed word so gou was moontlik stukkend gebyt - sy byt die toutjie of rekkie of stokkie af. Maar wanneer sy spring is dit hoog en bly sy dan sommer in die "mens" posisie totdat sy klaar gespeek het. Maar haar gunsteling van alle gunstelinge is ounooi se studeerkamer met al die kinderbediening goeters in.

Sy speel met die handpoppe en soft toys en lief om die boeke van die rak te stamp, maar die een ding wat sy oor mal is, is die pypskoonmakers (die kinders gebruik dit vir armpies en beentjies as hulle mannetjies maak). Sy het vroeg vroeg reeds die sakkkie ontdek en is altyd vinnig by om een uit die sakkie te haal. Daarmee word fetch gespeel en ons moet honderd keer die ding gooi dat sy dit kan terugbring.

Mens raak maar lekker moeg daarvoor en ek bere die sakkie in een van my klein laaitjies. Dawn weet presies in watter een en dan sal sy met haar pote deur die gaatjies werk en selfs haar tandjies daar indruk om een uit die sakkie in die laai te trek sodat ons kan speel - en moenie dink jy kan wegkom nie. Die rooi pypskoonmaker is so pas sommer bo op die sleutelbord gesit .... dis tyd vir fetch ounooi.

Ek weet mens raak woedend vir hulle soos daai ounooi in Angola, of mens bederf hulle tot in die afgrond soos die ounooi in Manasir, maar die feit is, mens kan half nie sonder hierdie dierekinders wees nie. Seker daarom dat al wat straatkat is haar kleintjies by ons voordeur kom aflaai en selfs twee dae terug 'n arme onversorgde hond ook sy pad hierheen gekry het.

Geniet julle troeteldiere !

Uitgevang ...!!!!

Ek weet nie of julle ook soos ek somtyds wonder waar 'n plek se naam of selfs 'n woord vandaan kom nie. Met die gemmerkat in die huis, dink ek ek het beslis uitgevind waar die woord "kattekwaad" (kaskenades, kwajongstreke, ondeundheid, stoutigheid) en ""kattemaai" (baljaar, jol, lawaai, rinkink ens.) vandaan kom. Jaaaaaaa, dis alweer 'n katstorie, maar al was sy stout was dit so oulik :-). Terwyl ounooi voor die rekenaar besig is, ontdek sy van ounooi se soft toys en kindergroep rakke .... aaahhhh wat is dit! Die uitsig van daar is nie goed genoeg nie so sy probeer 'n ander benadering. Daar word van nader ondersoek ingestel om te kyk watter speelgoed sy van hou en dit word afgestoot tot op die vloer. Sy's egter seker daar was nog speelgoed so ons probeer weer loer. Miskien as ek opklim en self uitkies wat ek wil he sal dit beter werk. Wag, hier's nog wat ek kan afstamp. Hier het ounooi eers bietjie geraas want die baba's mag nie breek nie. Dan sal ek maar onder moet gaan speel, die wit beertjie lyk oulik. Weet julle hoe lekker speel mens met beertjies en pom-poms?! Kyk mens kan jou poot so wegsteek in die pom-pom en dan die beertjie bekruip sonder dat dit jou sien kom. Na sy besluit het wat haar gunsteling speelding van die oggend is, word dit op haar "spesiale" plek saam met al haar ander speelgoed gebere --- kyk net al die balletjies, toutjies, klokkies, barney en selfs nog ou kersfeesversierings ---- in en rondom my kosbakke is dit veilig.

Die klein gemmer

Einde verlede jaar toe ons moes kies tussen die straatkat-baba's was Dawn die laaste keuse, maar sy het haarself pens en pootjies in ons huis ingewurm en klop ons onsself op die skouer oor "die regte keuse". Nelmari se "Ma jy moet foto's van Dawn opsit", en na Kathy se kat-mail vanoggend is dit sulke tyd. Reeds as 'n babakatjie het ons gesien sy is anders want watter baba-katjie sal nie weghardloop as 'n klein baba-mensie haar rondjaag nie? Sy het so mooi met Jenny gespeel en saam geslaap. Ons het haar 'n bietjie vroeer van haar ma geneem omdat ons bang was sy verdwyn in die drom- en straatwereld en word seergemaak deur al die groot mannetjies katte. Dit het beteken dat sy net wou slaap as sy aan my vinger kon suig. Toe was dit nog die pinkie.En baie gou was haar allerbeste speelding "Barney". Soos enige kleintjie het sy haar moeg gespeel met Barney en dan agterna was hy sommer haar slaapmaatjie. Maar sy word groot en die twee gewoontes word nie afgeskud nie. Nog steeds moet "mens-ma" se vinger gedrink word voor slaaptyd. Sy werk deur al vyf voordat sy elke keer rustig raak as sy by die duim uitkom.

Hier probeer Nelmari haar pla maar sy los nie die duim nie want dis slaaptyd.

En dan begin die duim sy werk doen en klein Dawn maak haar ogies toe. En moenie probeer om dit uit te trek nie.

Nou kan hoor en sien vergaan, sy't haar woelige bydra gemaak en gaan nou slaap

En Barney is nog steeds haar gunsteling speelgoed. Daar is 'n klein een en 'n grote en die kleintjie mag nerens anders as in my bed wees nie. Wanneer ons haar soek, laat ons Barney sing en sy kom hom gou-gou haal en bring hom bed toe.Barney word saam met al haar speelgoedjies in die hoekie gebere en uitgehaal om mee te speel wanneer sy so voel. (Sien selfs van die kersversierings het hulle plekkie in die hoekie gekry). Ek's nie sommer enige straatkat nie .... dink julle nie ook soos my mens-ma dat ek oulik is nie?