Wind waai ‘n hond uit ‘n bos

Die afgelope paar weke is die weer iets afgrysliks hier. Ek hoor dat Tom in sy nuuste rolprent 'n sandstorm "beleef" en volgens mense wat dit gesien het, is dit 'n vulletjie teen wat ons die laaste tyd mee moes deel.

Die laaste paar dae/weke is dit wat ons meestal ervaar op die pad.

En mens moet mooi kophou want die sig het niks aan die mense se kan-nie-bestuur-vernuf gedoen nie.

Die ergste wat ek in al die jare hier nog beleef het, was verlede naweek toe ons Ruwais toe gery het. Ons het eenmaal 'n maand 'n uitreik-diens daar in die woestyn.

Die wind was iets ysliks en met niks geboue langs die pad nie, net woestyn was dit by tye skrikwekkend.

So 'n paar kilometer voordat ons moet afdraai was dit ons uitsig en ons was effens bekommerd ons gaan die brug mis en in Saudi opeindig :-).

Hoeveel mense gaan in die weer vir die "diens" opdaag - ons het geweet die wat met die boot kom sal beslis nie opdaag nie. Maar soos altyd is God baie getrou en het ons in hierdie winderige, sanderige Shamel storm, 100% meer mense as verlede maand gehad. Die storms kan maar kom en ons probeer weghou, maar hier in die woestyn is groot goed aan die kom ook :-)

En dan natuurlik op bietjie stiller wind-dae (jy kan nog die sand in die lug sien) is dit ook 'n werkskeppingsgeleentheid - hoe anders kom die paaie weer skoon. Gelukkig is ons sandhoop in die portaal bietjie kleiner en mens stofsuig dit sommer.

Aanpassing in die Eikestad

Dis nou 'n maand sedert die begin van die lee-nes hier in die woestyn en die terugvoering van die Eikestad is baie goed. Dit klink asof Nelmari 'n fees het en die studentelewe en hopelik die studies ook baie geniet. Daar was groot speaches gegee voor die tyd hoe sy asb maar moet deelneem aan die "ontgroening" anders kan hulle sake maar moeilik maak vir hulle - maar moes hoor tydens die ouervergadering die ontgroening word vervang met orientering. Ja, ja daai een het ek ook al gehoor .... maar ek was beindruk.

Synde die koshuis met die meeste eerstejaars (500) dink ek hulle het die hele orientering uitstekend hanteer. Die studente is nie net met fun goed tuisgemaak nie, maar hulle het die dorp leer ken, hulle klasse, bib, ens. besoek en is goed ingeburger.

Een van die fun aktiwiteite was die opstel van 'n wereldrekord-mense-dominoes wat vir groot pret gesorg het.

Die lekker koshuisgronde het hom lekker geleen vir die voorbereiding van die trollieresies en die gees was goed onder die klomp eerstejaars.

Die koshuis het ook vanjaar sy eie saal in gebruik geneem en dit is elke aand gebruik om te oefen vir vensters en/of kuier

.

Vanwee die GROOT getal eerstejaars by hulle koshuis het die saamkuier met die ander koshuise nie altyd so goed uitgewerk nie. Daar was volgens Nelmari 7 meisies vir elke ou van die ander seunskoshuis en hulle moes toe plaas van met een ou kuier, 'n speed-date sessie he :-).

Net voor ek teruggekom het, wou ek met haar kuier en sy vertel toe dat hulle nie kan nie, hulle gaan see toe - ook maar hartseer oor die feit dat sy die see bo my verkies :-), hoor ek die volgende dag nee hulle is teveel om see toe te gaan - hulle gaan swembad toe. Vir my maak dit minder sin want 'n swembad is mos kleiner as die see, maar moes later die oggend lag toe sy vertel hoe hulle moes aanmeld en toe eintlik net op die grasperk voor die ingenieursgebou gaan "swem" het. Hier kan julle die verskillende "swemslae" sien. Hulle is darem so af en toe natgespuit en ek hoor wanneer die HK 'n haai sien was daar erg gegil.

Daar is ook lekker bondelsport gedoen en natuurlik die vensters opvoering. Ek dink aan die einde van die "orientering" was almal tuis in die dorp, universiteit en koshuis. Hulle kon voor die tyd kies of hulle wil inskakel by die orientering - dit was vrywillig - maar ek dink vir enige een wat dit nie gedoen het nie, is daar groot uitgemis.

Ons is bly dit gaan sover goed Nelmari. Ons en die dorp mis jou, maar ons weet jy's presies daar waar jy moet wees :-), geniet dit sussie!

Terug na ons kinderdae – groot pret

Laas het ek nog vertel dat ons vreeslik lekker gekuier tydens die reunie ...

Orals was daar groepies besig om op te vang en stories van jare terug te deel. En natuurlik het almal uitgesien na die "item" wat die tannies weer beplan het.

Hierdie keer het hul van die ander ingetrek en het ons geluister na stories van Dr Wollie en die suster wat "naby" was toe die Viljoen babatjies gebore is.

Alhoewel hulle 'n "script" gehad het, word die item uit hul kop gedoen en getrou aan die tradisie het hulle almal laat le van die lag.

En deel van hulle "item" was ons ons klomp te laat deelneem aan boeresport :-).

Oud en jonk - en hier moet ek nou praat van tussen 40 - 75 het deelgeneem aan die sakresie.

En 'n bietjie skelm wees was ook aan die orde van die dag. Die jonger een "64" moes 'n voordeel kry. Die ouer tannies was baie baie oulik.

Eier-in-die-lepel was volgende en die oom wys hoe mens dit eintlik doen.

Almal het so lekker deelgeneem en was groot sports. Die tannies is sommer 'n groot voorbeeld vir ons almal!

Was baie lekker om weer met almal op te vang en daar word al klaar gedink aan 'n tema vir volgende keer .... weet nog net nie wanneer nie!

‘n Lekker bonus in die Kaap

So 'n paar jaar terug het ons begin om die familie so bietjie bymekaar te kry met 'n groot reunie, en daarna was 'n gereelde bymekaarkom en opvang op die boeke. En elkeen is uniek en anders van die vorige keer. Gedurende my tyd in SA om Nelmari te help, is 'n bymekaarkom/reunie vir die oorblywende tannies, oom, niggies en nefies gehou.

Met streng opdragte van die tannies is daar goed in gereedheid gebring vir die dag. Ons was effens bekommerd aangesien ons nie meer "te" jonk is nie en gelukkig het Rene gesorg vir hulp sou dit nodig wees. Na aanleiding van alles wat daar moet wees, het ons sommer geweet hier kom groot sports.

En soos elke reunie voor dit is daar behoorlik 'n hond uit 'n bos gesels soos almal aangekom het. Nuus is opgevang en foto's is gewys.

Dit was dodelik warm in Wellington en die paar klein en agterkleinkinders wat saamgekom het, het die swembad omtrent geniet.

Die reunie is "amptelik" geopen deur die enige oorlewende seun oom Henry.

En die prop geskiet deur een van die tannies .... nou kan daar regtig gekuier word.

Piekniek mandjies is uitgehaal en die lekker eet het begin.

Natuurlik is daar ook gelag dat die biesies bewe en dit nog voordat die tannies/oom se nou reeds "beroemde" item begin.

Daarvan vertel ek later

Palms in die woestyn

Alhoewel palms taamlik algemeen voorkom in die woestyn hier by ons, is die Palms van Pretoria baie skaars hier. Terwyl ek dus in SA was om Nelmari ingerig te kry, het die twee Palms kom kuier.

Alhoewel Rufan eintlik aan die marathon in Dubai kom deelneem het, is die gewone "toeriste" goed ook met hulle gedoen.

En ondanks al die palms in die dorp, het hy nog steeds gedink hy is The One and Only Palm in die dorp.

Sheikha Juanita het 'n kans gehad om oa ook na die groot moskee te gaan kyk - altyd 'n besoek werd.

Dis nie al plekke wat hulle besoek het nie, met die gewone toeriste ding is alles wat gesien kan word in baie van die emirate gesien en besoek. Ek het al oor meeste van dit geblog en sal nie weer fotos van die plekke opsit nie. Behalwe vir ...

Die motormuseum van die reenboog sheikh...

Kyk hieroor het ek al ook baie geblog en foto's opgesit, maar hulle het iets kon sien, wat deur baie min mense, selfs hier van die dorp gesien kon word....dus

Oppad in die rigting van Liwa, was hulle net so verras om die groot piramide in die woestyn te sien. Nee, hulle was nie in Egipte nie, maar by die reenboog Sheikh - so vernoem omdat hy baie lief is vir kleure met veral sy motors - se motorversameling/museum.

Hierdie foto'tjie is 'n tydjie terug van sy karavaan geneem en Nelmari kon skaars by die onderkant bykom. Wat sou mens met so 'n karavaan maak? Of nog erger, hoe sleep mens so 'n karavaan?

Voor ons dit kan antwoord, moet ons eers verby een van sy mercedese met klein wieletjies loop.

En binne ... die groot ou Dodge bakkie wat gebruik is om die karavaan te sleep. Hierdie Dodge Power Wagon is 4x op skaal groter as die normale een.

Hulle twee wys hoe groot die wiele nou eintlik is en kry 'n geleentheid wat vir min beskore is, om binnekant te kyk in die bakkie.

Daar word gese dat hierdie motorhuis 4 slaapkamers, 6 badkamers, 'n kombuis en sitkamer het, wat dit die grootste motorhuis in die wereld maak. Die twee in een van die kamers.

Niks fensie nie, maar bly in gedagte hou, dat dit eintlik binne in 'n bakkie is :-)

Lekker kuierplek waar die mans seker kuier en koffie drink.

En nog 'n ou kamertjie binne-in.

Net so vir die wat nie vorige kere gesien het nie, as mens die bultjie agter opstap is daar 'n groot Jeep wat oor die pad getrek is :-)

Hierdie is nog een van die yslike groot motors van die sheikh en dit word as 'n winkel/restaurant gebruik.

Die binnekant van die winkel wat eintlik die jeep se kattebak is.

As julle nog foto's van die museum en al die andergoed wat hy daar het wil sien, kliek op die label hieronder.

Palms .... ons hoop julle het die dorp geniet en gesien dat Abu Dhabi ook goedjies het om te sien :-).