Het lanklaas weer bietjie nuus gegee maar het so 'n goeie verskoning. Is tans in die Kaap vir 'n kort paar daggies.
Ek weet ek het al oor Ferari world geskryf, maar met William se kuier het ek besluit om self bietjie saam met die kinders te gaan kyk wat daar aangaan. Ons was redelik vroeg daar, maar self toe moes mens maar in die tou staan vir kaartjies. Gelukkig niks so erg soos die toue van besienswaardighede in Europa nie. Die kinders was bietjie teleurgesteld dat die vinnigste rollercoaster ter wereld af was vir die dag, maar ons het tog besluit om wel op die ander goed te gaan ry.
Die jongklomp het ernstig elke keer die kaart bestudeer oor waarnatoe hulle wil gaan en die twee "ou" tannies het geduldig saamgestap en behalwe op een ding aan alles meegedoen!
By 'n uitstalling van ou Ferrari motors, het elkeen sy keuse van 'n motor gemaak.
Vir kleintjies is daar hope pret en motorritte en mens kon jou verkyk aan hulle gesiggies soos hulle konsentreer om die motors te bestuur.
Die windtonnel moes natuurlik ook uitgetoets word - dis hier waar jy kan voel hoe vinnig die motors om die baan jaag.
Daarna is ons ook op 'n 4D rit wat net soos die ware jakob voel. Selfs as die motor deur water jaag, voel ons die water.
Kyk net hoe hou William se oe toe :-). Nog speelplekke vir die kleintjies en die jongklomp tydens 'n rit deur 'n "ferrari enjin" kom papnat daar uit.
Daar is selfs 'n rit "deur Italie" en ons het selfs van die bakens herken waar ons verbygery het gedurende ons "toer"
.
Weer 'n 3D rit wat ons hierdie keer moes brille opsit en ja ons ou tannies was by.
By gebrek aan die vinnigste rollercoaster wat nie gewerk het nie, is daar darem 'n ander opsie ook en hier maak die klomp reg om resies te jaag teen die motortjies op hulle linkerkant.
Nadat ons baie gestap en gedoen het, is dit tyd om huistoe te gaan en die kinders maak al klaar plan hoe hulle "die volgende keer" se ritte sal aanpak.
Groete uit die Kaap
